‘मधुशाला ते ज्ञानशाला’: अहमदपूरच्या शाळेत अमिताभ बच्चन यांचा वाढदिवस कविता आणि नवोपक्रमांनी साजरा

अहमदपूर : येथील डॉ. हरिवंशराय बच्चन विद्यालयाने अभिनेते अमिताभ बच्चन यांचा ८४ वा वाढदिवस रविवारी (ता. ११) ‘मधुशाला ते ज्ञानशाला’ या उपक्रमाने साजरा केला. केक किंवा मेणबत्त्या न लावता साहित्य, सर्जनशीलता आणि नवोपक्रम यांची सांगड घालणारा हा कार्यक्रम होता.

विद्यार्थ्यांनी डॉ. हरिवंशराय बच्चन यांच्या कविता स्वतःच्या आवाजात गाऊन ध्वनिमुद्रित केल्या आणि नृत्यही सादर केले, असे या अनुदानित शाळेचे संस्थापक निवृत्ती यादव यांनी सांगितले. याच उपक्रमातून शाळेचा विसावा वर्धापनदिनही साजरा झाला. ग्रामीण भागातील मुलांमध्ये हिंदी साहित्याची, सर्जनशीलतेची आणि डिजिटल शिक्षणाची आवड वाढवणे, हा त्यामागचा उद्देश होता.

कविता आणि शैक्षणिक मजकूर हिंदी, मराठी आणि इंग्रजीत ऐकता येईल, अशी ऑडिओ क्यूआर कोडची ज्ञानपेढी विद्यार्थ्यांनी तयार केली आहे. कोणताही खर्च न लागणाऱ्या या उपक्रमात ‘स्क्रीनकडून आवाजाकडे’ असा दृष्टिकोन ठेवला आहे. मोबाईलवरील खेळांचे मुलांचे वेड कमी करणे, ऐकण्याचे कौशल्य वाढवणे आणि साहित्याची गोडी लावणे, हा त्याचा हेतू असल्याचे शाळेच्या एका अधिकाऱ्याने सांगितले. अमिताभ बच्चन यांच्या वयाचे प्रतीक म्हणून विद्यार्थ्यांनी ८४ या आकड्याच्या आकारात मानवी साखळीही केली.

माहिती स्रोत: द प्रिंट