लातूर जिल्हा पोलीस क्रीडा स्पर्धेत मुख्यालयाचे वर्चस्व; मुसीब पठाण, रेशमा गिराम सर्वोत्कृष्ट खेळाडू

लातूर : पोलीस मुख्यालयाच्या कवायत मैदानावर झालेल्या ३० व्या लातूर जिल्हा पोलीस क्रीडा स्पर्धेचा उत्साहात समारोप झाला. तीन दिवस चाललेल्या या स्पर्धेत सुमारे १२५ पोलीस अधिकारी, अंमलदार आणि महिला खेळाडू सहभागी झाले होते. अधिकारी-कर्मचाऱ्यांचे शारीरिक व मानसिक आरोग्य जपणे आणि त्यांच्यातील संघभावना, नेतृत्वगुण व समन्वय वाढवणे, हा स्पर्धेचा उद्देश होता.

स्पर्धेतील कामगिरीच्या आधारे पुरुष गटात पोलीस अंमलदार मुसीब पठाण आणि महिला गटात पोलीस अंमलदार रेशमा गिराम यांची ‘सर्वोत्कृष्ट खेळाडू’ म्हणून निवड झाली. जिल्हाधिकारी डॉ. भारत बास्टेवाड यांच्या हस्ते दोघांना सन्मानचिन्ह आणि प्रशस्तिपत्र देऊन गौरवण्यात आले. विविध प्रकारांत चमकलेल्या खेळाडूंनाही सन्मानचिन्हे देण्यात आली. पोलीस अधीक्षक अमोल तांबे, अपर पोलीस अधीक्षक मंगेश चव्हाण आदी उपस्थित होते.

सांघिक प्रकारांत पोलीस मुख्यालयाने पुरुषांच्या व्हॉलीबॉल, बास्केटबॉल, खो-खो आणि हॉकीत, तर महिलांच्या व्हॉलीबॉल आणि बास्केटबॉलमध्ये पहिला क्रमांक मिळवला. पुरुषांच्या फुटबॉल आणि हँडबॉलमध्ये निलंगा विभाग, तर कबड्डीत चाकूर विभाग विजेता ठरला. महिलांच्या कबड्डीत निलंगा विभागाने आणि खो-खोमध्ये अहमदपूर विभागाने बाजी मारली.

माहिती स्रोत: सकाळ