दुष्काळामुळे लातूर जिल्ह्यातील ८२ हजार विद्यार्थ्यांचे दहावी-बारावी परीक्षा शुल्क माफ

लातूर : राज्य सरकारने २६५ तालुक्यांत दुष्काळ जाहीर करून तेथे विविध सवलती लागू केल्या आहेत. दुष्काळग्रस्त भागांतील शाळा-महाविद्यालयांतील विद्यार्थ्यांचे परीक्षा शुल्क माफ करणे, ही त्यांपैकी एक सवलत आहे. त्यानुसार फेब्रुवारी-मार्चमध्ये होणाऱ्या दहावी आणि बारावीच्या परीक्षेसाठी विद्यार्थ्यांकडून शुल्क घेऊ नये, असे निर्देश जिल्हा परिषदेच्या शिक्षण विभागाने जिल्ह्यातील शाळांना दिले आहेत.

संपूर्ण लातूर जिल्हा दुष्काळग्रस्त जाहीर झाला असल्याने कोणत्याही मुख्याध्यापकाने दहावी किंवा बारावीच्या विद्यार्थ्यांकडून परीक्षा शुल्क घेऊ नये, असे शिक्षण विभागाने स्पष्ट केले आहे. या निर्णयाचा लाभ दहावीच्या ४७,५५५ आणि बारावीच्या ३४,५१९ अशा एकूण ८२,०७४ विद्यार्थ्यांना मिळणार आहे.

तालुकानिहाय लाभार्थ्यांमध्ये लातूर तालुका आघाडीवर असून तेथे ३१,२१४ विद्यार्थी आहेत. त्यानंतर उदगीर (११,७०१), अहमदपूर (८,६२२), निलंगा (७,७९९), औसा (७,४१५), चाकूर (४,६९४), देवणी (३,१९५), जळकोट (३,१३४), रेणापूर (२,६७०) आणि शिरूर अनंतपाळ (१,६३०) यांचा क्रमांक लागतो, अशी माहिती जिल्हा परिषदेच्या शिक्षण विभागाने दिली.

माहिती स्रोत: सकाळ