रामेश्वरच्या संत गोपाळबुवा महाराज साखर कारखान्याचा गळीत हंगाम सुरू; उसाला प्रतिटन ३,१५१ ते ३,३५१ रुपये भाव

लातूर : तालुक्यातील रामेश्वर येथील संत श्री गोपाळबुवा महाराज शुगर अँड ॲग्रो फूड इंडस्ट्रीज या खासगी साखर कारखान्याच्या दुसऱ्या गळीत हंगामाला रविवारी (ता. ११) सुरुवात झाली. घटस्थापनेच्या मुहूर्तावर सकाळी अकरा वाजता ह.भ.प. महाराजांच्या हस्ते गव्हाणीत उसाची मोळी टाकून हंगामाचा शुभारंभ करण्यात आला. लातूर ग्रामीण मतदारसंघातील ऊस उत्पादकांच्या आग्रहावरून हा कारखाना उभारण्यात आला आहे.

कारखान्याचे अध्यक्ष राजेश कराड यांनी या हंगामातील ऊसदर जाहीर केले. ११ ऑक्टोबर ते १५ नोव्हेंबरदरम्यान गाळपास येणाऱ्या उसाला प्रतिटन ३,१५१ रुपये, १ डिसेंबर ते १५ जानेवारीदरम्यानच्या उसाला ३,२५१ रुपये आणि १५ जानेवारीनंतरच्या उसाला ३,३५१ रुपये भाव दिला जाईल, असे त्यांनी सांगितले. दिवाळीसाठी सभासद शेतकऱ्यांना आणि गेल्या वर्षी ऊस दिलेल्या शेतकऱ्यांना ३० रुपये किलो दराने दहा किलो गूळ पावडर दिली जाईल. कर्मचाऱ्यांना सात टक्के पगारवाढ आणि दहा टक्के दिवाळी बोनस, तर ऊसतोड मजुरांना दरवर्षी दिवाळी फराळ देण्याची घोषणाही त्यांनी केली.

कारखाना कोणाशीही स्पर्धा न करता योग्य दिशेने वाटचाल करत आहे, असे सांगून कराड यांनी वजनाबाबत खुले आव्हान दिले. बाहेरच्या कोणत्याही वजनकाट्यावर उसाचे वजन करून आणा; कारखान्याच्या काट्यावरील वजनात फरक आढळला तर त्याच दिवशी कारखाना बंद करू, असे ते म्हणाले. कारखान्याचे मुख्य प्रवर्तक तुळशीराम (अण्णा) कराड, काशीराम (नाना) कराड यांच्यासह विविध पदाधिकारी या वेळी उपस्थित होते. दुष्काळाचे संकट दूर व्हावे, अशी प्रार्थना उपस्थित महाराजांनी केली.

माहिती स्रोत: हिंदुस्थान समाचार