दर जाहीर न करताच ऊसतोड सुरू; माढा-पंढरपुरात स्वाभिमानीने ऊस वाहतूक रोखली

सोलापूर : चालू गळीत हंगामातील उसाचा दर जाहीर न करताच साखर कारखान्यांनी ऊसतोड सुरू केल्याने स्वाभिमानी शेतकरी संघटना आक्रमक झाली आहे. संघटनेच्या कार्यकर्त्यांनी माढा आणि पंढरपूर तालुक्यांत उसाची वाहतूक करणारी वाहने अडवली. भीमानगर येथे बारामती ॲग्रो कारखान्याच्या कार्यालयाला टाळे ठोकून उसाचा दर जाहीर करण्याची मागणी करण्यात आली.

उत्पादन खर्चाच्या ओझ्याखाली शेतकरी दबलेला असताना कारखानदारांनी दर स्पष्ट न करता तोडणी सुरू केल्याने शेतकऱ्यांमध्ये संताप आहे. एकदा ऊस कारखान्यात गेल्यानंतर कारखाना ठरवेल तो दर मान्य करण्याची वेळ शेतकऱ्यांवर येऊ नये, म्हणून ही भूमिका घेतल्याचे संघटनेने म्हटले आहे.

शेतकऱ्यांना विश्वासात न घेता आणि दर स्पष्ट न करता कारखाने सुरू करणे अन्यायकारक असून योग्य दर जाहीर झाल्याशिवाय तोडणी आणि वाहतूक सुरू होऊ देणार नाही, अशी संघटनेची भूमिका आहे. शेतकऱ्यांच्या कष्टाला योग्य मोबदला मिळावा आणि उत्पादन खर्च भरून निघून त्यांच्या हातात काही पैसे उरावेत, ही मागणी असल्याचे संघटनेने सांगितले.

कारखान्यांनी तातडीने दर जाहीर न केल्यास सोलापूर जिल्ह्यात ऊसदराचे आंदोलन अधिक तीव्र केले जाईल, असा इशारा संघटनेने दिला आहे.

माहिती स्रोत: सामना