पंढरपुरात विठ्ठल-रुक्मिणीला १६६ ग्रॅमचे दोन सुवर्ण तुळशीहार अर्पण

पंढरपूर : श्री विठ्ठल-रुक्मिणी मातेच्या चरणी मुंबईतील एका भाविक दाम्पत्याने रविवारी (११ ऑक्टोबर) दोन सोन्याचे तुळशीहार अर्पण केले. दोन्ही हारांचे एकत्रित वजन १६६ ग्रॅम असून त्यांची किंमत सुमारे २२ लाख रुपये आहे. विठ्ठल-रुक्मिणीवरील श्रद्धेपोटी ही सुवर्णभेट दिल्याचे सांगण्यात आले.

श्री विठ्ठल-रुक्मिणी मंदिरे समितीच्या सदस्या शकुंतला नडगिरे यांनी देणगीदार दाम्पत्याचा यथोचित सत्कार केला. मंदिरासाठी भाविक विविध स्वरूपात देणग्या देत असतात आणि त्यातून त्यांची देवावरील निष्ठा व्यक्त होते, असे समितीच्या वतीने सांगण्यात आले.

दरम्यान, राज्यातील दुष्काळी परिस्थिती लक्षात घेऊन मंदिर समितीने नुकताच मुख्यमंत्री सहायता निधीला दोन कोटी रुपये देण्याचा निर्णय घेतला आहे. आगामी कार्तिकी यात्रा १० ते २४ नोव्हेंबरदरम्यान होणार असून भाविकांच्या सोयीसाठी १४ नोव्हेंबरपासून २४ तास दर्शन सुरू ठेवले जाणार आहे.

माहिती स्रोत: आधुनिक केसरी; द फोकस इंडिया