शिरपूर तालुक्यात खरीप हातचा गेला; आमदार काशिराम पावरा यांची भटाणे शिवारात पाहणी

शिरपूर : गेल्या दोन महिन्यांपासून पावसाने ओढ दिल्याने शिरपूर तालुक्यात खरीप हंगामातील पिकांचे अतोनात नुकसान झाले आहे. या पार्श्वभूमीवर आमदार काशिराम पावरा यांनी भटाणे परिसरातील शेतात जाऊन दुष्काळग्रस्त पिकांची पाहणी केली आणि शेतकऱ्यांच्या अडचणी जाणून घेतल्या.

खरीप हंगाम हातचा गेला असून पावसाच्या अनिश्चिततेमुळे रब्बी हंगामही संकटात आल्याची भीती शेतकऱ्यांनी व्यक्त केली. सरकारने आता वेळ न दवडता भरीव मदत लगेच जाहीर करावी, असे शेतकऱ्यांचे म्हणणे होते. बाजार समितीचे सभापती के. डी. पाटील यांच्यासह शेतकरी या वेळी उपस्थित होते.

माजी मंत्री आमदार अमरिशभाई पटेल आणि आपण शेतकऱ्यांच्या पाठीशी असून शासनाकडून भरीव मदत मिळवून देण्यासाठी पाठपुरावा करत आहोत, शेतकऱ्यांनी धीर सोडू नये, असे आमदार पावरा यांनी सांगितले.

खरीप २०२६ मधील स्थिती पाहून राज्य शासनाने जाहीर केलेल्या दुष्काळग्रस्त तालुक्यांच्या पहिल्या यादीतच शिरपूरचे नाव आहे. पीक नुकसानीचे पंचनामे प्रशासनाने वेगाने पूर्ण केले असून त्यांचा अहवाल शासनाकडे पाठवला जात असल्याचे सांगण्यात आले.

माहिती स्रोत: सकाळ