रत्नागिरीत १३,७७६ शेतकऱ्यांच्या पिकांचे पंचनामे पूर्ण; चार हजार हेक्टरहून अधिक क्षेत्राची नोंद

रत्नागिरी : यंदाच्या खरीप हंगामात रत्नागिरी जिल्ह्यात भात आणि नाचणी या प्रमुख पिकांखाली सुमारे ५२ हजार हेक्टर क्षेत्र आहे. नुकसानीच्या पार्श्वभूमीवर प्रशासनाने गावनिहाय पंचनामे करण्याचे आदेश दिले असून, आतापर्यंत ४,०७३.५९ हेक्टरवरील पिकांचे पंचनामे पूर्ण झाले आहेत. त्यात १३,७७६ नुकसानग्रस्त शेतकऱ्यांचा समावेश आहे.

ग्राम महसूल अधिकारी, ग्रामविकास अधिकारी आणि सहायक कृषी अधिकारी या तीन यंत्रणा एकत्रितपणे गावोगावी जाऊन पाहणी करत आहेत. एकही बाधित शेतकरी मदतीपासून वंचित राहू नये, याची काळजी घेतली जात असल्याचे प्रशासनाने स्पष्ट केले आहे.

तालुकानिहाय पाहता सर्वाधिक पंचनामे संगमेश्वर तालुक्यात झाले असून तेथे २,५७८ शेतकऱ्यांचे ७१५ हेक्टर क्षेत्र नोंदले गेले आहे. रत्नागिरी तालुक्यात १,७०४ शेतकऱ्यांचे ७७८.७९ हेक्टर, राजापूरमध्ये १,७७० शेतकऱ्यांचे ५९९ हेक्टर, तर दापोलीत १,६७८ शेतकऱ्यांचे ४५६.०७ हेक्टर क्षेत्र पंचनाम्यांत आले आहे. गुहागर, लांजा, खेड, चिपळूण आणि मंडणगड तालुक्यांतही हे काम सुरू आहे.

माहिती स्रोत: रत्नागिरी खबरदार