केंद्रीय पथकाची गेवराई, बीड तालुक्यांत पाहणी; ‘आता या उसाला काडी लावायची का?’ शेतकऱ्याचा सवाल

गेवराई : बीड जिल्ह्यातील दुष्काळी परिस्थितीची प्रत्यक्ष पाहणी करण्यासाठी केंद्रीय कृषी व शेतकरी कल्याण विभागाचे संयुक्त सचिव मुक्तानंद अग्रवाल यांच्या नेतृत्वाखालील केंद्रीय पथकाने शुक्रवारी (ता. ९) गेवराई आणि बीड तालुक्यांतील गावांना भेटी दिल्या. गेवराई तालुक्यातील जातेगाव फाटा परिसरातील शेतांपासून पथकाने दौऱ्याला सुरुवात केली. राज्याचे कृषी सचिव परिमल सिंग, जिल्हाधिकारी विवेक जॉन्सन, जिल्हा परिषदेचे मुख्य कार्यकारी अधिकारी जितिन रहमान आणि आमदार विजयसिंह पंडित यांच्यासह अधिकारी उपस्थित होते.

अर्धमसला आणि रानमळा परिसरात पथकाने कापूस, ऊस आणि तुतीच्या पिकांची पाहणी केली. पाण्याअभावी पिकांची वाढ खुंटली असून करपलेली पिके जनावरांना चारा म्हणूनही उपयोगी पडत नाहीत, असे शेतकऱ्यांनी सांगितले. अर्धमसला येथे वाळलेल्या उसाकडे पाहत ‘आता या पिकाला काडी लावून जाळून टाकायचे का?’ असा उद्विग्न सवाल शेतकरी सुरेश नरवाडे यांनी केला.

जुलैच्या पहिल्या आठवड्यापासून पाऊस नाही आणि विहीर आटल्याने पिण्याच्या पाण्यासाठी स्वखर्चाने टँकर मागवावा लागतो, अशी व्यथा गेवराईतील एका शेतकऱ्याने मांडली. परिसरातील इतर शेतकऱ्यांनीही ऊस जळून गेल्याचे सांगितले. बीड तालुक्यातील पारगाव जप्ती येथे पथकाने सोयाबीनच्या पिकाची पाहणी केली.

नांदुरा हवेली येथे पथकाने सिंदफणा नदीच्या कोरड्या पात्राची पाहणी केली. माजलगाव धरणातील पाणीसाठा सरासरीच्या २६ टक्क्यांपर्यंत घसरल्याची माहिती या वेळी देण्यात आली. पावसाचे पाणी अडवण्यासाठी बंधारे, भूजल पुनर्भरण आणि गाळ साचलेल्या विहिरींचे पुनरुज्जीवन अशा उपाययोजनांची गरज स्थानिकांनी मांडली.

माहिती स्रोत: पुढारी; महासंवाद