धोप येथील शेतकऱ्याच्या कुटुंबीयांची परिणय फुके यांनी घेतली भेट; धान बोनस, दुष्काळी मदतीबाबत मुख्यमंत्र्यांशी चर्चा करणार

भंडारा : मोहाडी तालुक्यातील धोप येथील एका शेतकऱ्याने गुरुवारी (ता. ८) जीवन संपवल्यानंतर भाजप नेते आणि माजी राज्यमंत्री परिणय फुके यांनी शुक्रवारी (ता. ९) त्यांच्या कुटुंबीयांची भेट घेऊन सांत्वन केले. दुष्काळ आणि किडीच्या प्रादुर्भावामुळे या शेतकऱ्याचे भातपीक जवळपास पूर्णपणे हातचे गेले होते, असे ‘एबीपी माझा’ने म्हटले आहे.

कुटुंबाच्या दुःखात आम्ही सहभागी आहोत, असे सांगत मुलांचे शिक्षण असो वा इतर कोणतीही अडचण, ती सोडवण्यासाठी सातत्याने कुटुंबाच्या पाठीशी राहू, असे आश्वासन फुके यांनी दिले. दुष्काळामुळे या भागातील शेतीचे मोठे नुकसान झाले असून बावनथडी प्रकल्पातून पाणी सोडले न गेल्याने अनेक शेतकरी त्रस्त आहेत, असेही ते म्हणाले.

धानाच्या बोनसबाबत, तसेच दुष्काळी आर्थिक मदत शेतकऱ्यांना तातडीने मिळावी यासाठी मुख्यमंत्र्यांशी चर्चा करणार असल्याचे फुके यांनी सांगितले. धान उत्पादक जिल्ह्यांतील आमदार-खासदारांची मंत्री छगन भुजबळ यांच्याकडे बैठक झाली असून, या जिल्ह्यांतील नुकसानभरपाई लवकरात लवकर देण्याचे आदेश भुजबळ यांनी दिले आहेत; बोनसच्या प्रश्नावर मुख्यमंत्र्यांकडे बैठक घेऊन तोडगा काढला जाईल, अशी माहितीही त्यांनी दिली.

दरम्यान, या शेतकऱ्याच्या मृत्यूप्रकरणी पालकमंत्री पंकज भोयर आणि संबंधित अधिकाऱ्यांविरोधात गुन्हा दाखल करावा, तसेच कुटुंबाला एक कोटी रुपयांची मदत आणि कुटुंबातील एका सदस्याला शासकीय नोकरी द्यावी, अशी मागणी शिवसेनेचे (उद्धव बाळासाहेब ठाकरे) जिल्हाप्रमुख संजय रेहपाडे यांनी केली आहे.

माहिती स्रोत: एबीपी माझा; देशोन्नती