केंद्रीय पथक यवतमाळमधील शेतांच्या बांधावर; कापूस, सोयाबीन, तुरीच्या नुकसानीची पाहणी

यवतमाळ : खरीप हंगामात पावसाचा खंड पडून पिके करपल्याने निर्माण झालेल्या दुष्काळी स्थितीची पाहणी करण्यासाठी केंद्र सरकारच्या आंतरमंत्रालयीन पथकाने शनिवारी (१० ऑक्टोबर) यवतमाळ जिल्ह्याचा दौरा केला. पथकाने यवतमाळ तालुक्यातील मडकोना व लासिना आणि नेर तालुक्यातील दोडकी, लोणी, मांडवगड व वटफळी या गावांतील शेतांत जाऊन कापूस, सोयाबीन आणि तूर पिकांचे मूल्यांकन केले आणि शेतकऱ्यांशी संवाद साधला.

केंद्रीय जलसंपदा विभागाच्या संनियंत्रण संचालनालयाचे संचालक अर्जेश कुमार मधोक हे पथकप्रमुख होते. कृषी व शेतकरी कल्याण विभागाच्या अवर सचिव सीमा राणी, ग्रामीण विकास विभागाचे अवर सचिव संजय मीना आणि वित्त मंत्रालयाच्या व्यय विभागाचे सहसंचालक महेश कुमार हेही पथकात होते. जिल्हाधिकारी विकास मीना, जिल्हा अधीक्षक कृषी अधिकारी मनोजकुमार ढगे यांच्यासह विविध विभागांचे अधिकारी सोबत होते.

पथकाने यवतमाळ शहरातील श्री गौरक्षण संस्थेच्या गोशाळेत गायींची संख्या, उपलब्ध चारा आणि शासनाच्या उपाययोजनांची माहिती घेतली. किटा कापरा (ता. यवतमाळ) येथील लघुसिंचन प्रकल्पावर घटलेली पाणीपातळी, भूजलाची स्थिती आणि उपाययोजनांचा आढावा घेतला. आत्महत्याग्रस्त शेतकरी कुटुंबाची भेट घेऊन पथकाने त्यांच्या अडचणीही जाणून घेतल्या.

राज्य शासनाने २६५ तालुक्यांत दुष्काळाचा पहिला ट्रिगर लागू केला असून त्यात यवतमाळ जिल्ह्यातील सर्व १६ तालुके आहेत. जिल्ह्यात सुमारे ८.१८ लाख पशुधन असून चाऱ्याची कमतरता जाणवत असल्याने काही शेतकऱ्यांवर जनावरे विकण्याची वेळ आली आहे, असे ‘लोकसत्ता’ने म्हटले आहे. पाहणीच्या आधारे पथक केंद्र सरकारला अहवाल देणार असून त्यानुसार केंद्राकडून मदतीबाबत पुढील कार्यवाही होईल, असे शासनाच्या प्रसिद्धिपत्रकात म्हटले आहे.

माहिती स्रोत: लोकसत्ता; हिंदुस्थान समाचार; महासंवाद