दुष्काळात चारा जिल्ह्यातच राहणार; वाशीमबाहेर चारा नेण्यास आणि विकण्यास जिल्हाधिकाऱ्यांची मनाई

वाशीम : जिल्ह्यातील सहाही तालुक्यांत दुष्काळ जाहीर झाल्याने पशुधनासाठी पुरेसा चारा उपलब्ध राहावा म्हणून जिल्ह्यातून इतर जिल्ह्यांत तसेच राज्याबाहेर चारा नेण्यास आणि विकण्यास मनाई केली आहे. याबाबतचे आदेश जिल्हाधिकारी योगेश कुंभेजकर यांनी जारी केले आहेत, असे ‘ॲग्रोवन’ने म्हटले आहे.

जिल्ह्यात तयार होणारा चारा मोठ्या प्रमाणात इतर जिल्ह्यांत आणि सीमावर्ती भागांत विक्रीसाठी पाठवला जात असल्याचे पशुसंवर्धन विभागाने प्रशासनाच्या लक्षात आणून दिले होते. असेच सुरू राहिल्यास पुढे जिल्ह्यात तीव्र चाराटंचाई निर्माण होऊन जनावरांचे जीव धोक्यात येऊ शकतात आणि त्यातून कायदा व सुव्यवस्थेचा प्रश्नही उद्भवू शकतो, म्हणून हा प्रतिबंधात्मक निर्णय घेण्यात आला आहे.

या आदेशानुसार जिल्ह्याच्या महसुली हद्दीतून कडबा, कुट्टी, पेंढा यांसह कोणताही सुका किंवा ओला चारा इतर जिल्ह्यांत किंवा राज्याबाहेर नेण्यास आणि विकण्यास सक्त मनाई आहे. शासकीय योजनांतर्गत होणारी तसेच पशुसंवर्धन विभाग किंवा जिल्हा प्रशासनाची अधिकृत परवानगी असलेली चारा वाहतूक मात्र या आदेशातून वगळण्यात आली आहे.

आदेशाचे उल्लंघन करणाऱ्यांवर कायदेशीर कारवाई होईल. दुष्काळाच्या काळात जिल्ह्यातील जनावरांना चारा कमी पडू नये, हाच या आदेशामागचा हेतू असल्याचे जिल्हाधिकारी कुंभेजकर यांनी स्पष्ट केले आहे.

माहिती स्रोत: ॲग्रोवन