पूर्णा तालुक्यात पीक कापणी प्रयोगात २० आर क्षेत्रातून अवघे अर्धा किलो सोयाबीन

पूर्णा : तालुक्यात यंदा पावसाअभावी कोरड्या दुष्काळाची स्थिती असून अत्यल्प पावसावर पेरलेले सोयाबीन शेंगांसह वाळून गेले आहे. सध्या तालुक्यातील सर्व महसूल मंडळांत कृषी आणि महसूल विभागाचे अधिकारी शेतकऱ्यांच्या उपस्थितीत पीक कापणी प्रयोग घेत आहेत. निवडलेल्या शेतातील २० आर क्षेत्रातील सोयाबीन कापून मळणी केली असता अवघे अर्धा किलो उत्पादन मिळत आहे.

शेंगा चपट्या झाल्या असून त्यातील दाणे ज्वारीच्या दाण्याएवढेही नाहीत. कापलेले सोयाबीन जनावरांच्या चाऱ्यापेक्षा चुलीसाठीच्या जळणासारखे दिसत आहे. पेरणीसाठी वापरलेल्या बियाण्याइतकेही उत्पादन हाती येत नसल्याने शेतकरी हवालदिल झाले असून अनेक ठिकाणी मळणीचा खर्चही निघणे कठीण आहे. कडक उन्हामुळे विहिरी आणि बोअरवेलही कोरड्या पडू लागल्याने ग्रामीण भागात पाणीटंचाई जाणवू लागली आहे.

दुष्काळ जाहीर होऊन अनेक दिवस झाले तरी प्रत्यक्ष मदत मिळालेली नाही आणि हेक्टरी किती अनुदान मिळणार याबाबत स्पष्टता नाही, अशी शेतकऱ्यांची तक्रार आहे. मागील खरीप हंगामातील पीकविम्याची भरपाईही अजून मिळाली नसल्याचे ते सांगतात. पाहणी आणि पंचनाम्यांपलीकडे जाऊन सरकारने हेक्टरी ५० हजार रुपयांचे अनुदान तातडीने जाहीर करावे आणि ते थेट शेतकऱ्यांच्या खात्यात जमा करावे, अशी मागणी होत आहे. मदत न मिळाल्यास आंदोलनाची तयारी शेतकरी करत असल्याचे चित्र आहे.

माहिती स्रोत: पुढारी