पिंपळगाव रेणुकाई परिसरात सोयाबीनचे एकरी जेमतेम एक क्विंटल उत्पादन; शेंगांत दाणेच नाहीत

पिंपळगाव रेणुकाई : भोकरदन तालुक्यातील पिंपळगाव रेणुकाईसह परिसरात सोयाबीनची काढणी वेगात सुरू आहे; मात्र मळणीनंतर शेतकऱ्यांच्या हाती निराशाच येत आहे. झाडांना शेंगा भरपूर लागल्या, पण त्यांत दाणे भरले नाहीत. त्यामुळे एकरी केवळ एक ते सव्वा क्विंटल सोयाबीन निघत असून गतवर्षी हेच उत्पादन चार ते पाच क्विंटल होते, असे स्थानिक शेतकऱ्यांनी सांगितले.

ज्या शेंगांत दाणे आहेत, तेही अतिशय बारीक आणि चपटे आहेत. अशा मालाला बाजारात मागणी नसल्याने व्यापारीही तो घ्यायला तयार नाहीत. काढणीसाठी रोज चार ते पाच मजूर लावावे लागत असल्याने लागवडीचा खर्चही निघत नसल्याची स्थिती आहे.

पावसातील खंड, त्यानंतर सततचा पाऊस आणि दाणे भरण्याच्या अवस्थेत पिकावर आलेला ताण यामुळे हे नुकसान झाल्याचे कृषी तज्ज्ञांचे मत आहे.

दोन एकरांवर सोयाबीन घेतले, पण खळे केल्यावर दोनच क्विंटल माल निघाला आणि लागवड खर्चही वसूल झाला नाही, असे शेतकरी गजानन नरवाडे यांनी सांगितले. शेतीऐवजी मजुरी केली असती तर रोज सहाशे रुपये मिळाले असते, अशी व्यथा त्यांनी मांडली.

माहिती स्रोत: पुढारी