परभणी जिल्ह्यात पीक नुकसानीच्या पंचनाम्यांना संथ गती; सव्वा लाख हेक्टरचे पंचनामे अद्याप बाकी

परभणी : पावसाच्या दीर्घ खंडामुळे सोयाबीन, कापूस, तूर यांसह खरीप पिके करपली असून नुकसानभरपाईची वाट पाहणाऱ्या शेतकऱ्यांसाठी पंचनाम्यांची संथ गती चिंतेचा विषय ठरली आहे. ८ ऑक्टोबरपर्यंत जिल्ह्यातील ५ लाख ५२ हजार ४३२ हेक्टर बाधित क्षेत्रापैकी ७६.८६ टक्के, म्हणजे सुमारे ४ लाख २४ हजार ५९१ हेक्टर क्षेत्राचे पंचनामे पूर्ण झाले होते. अद्याप १ लाख २७ हजार ८४१ हेक्टरवरील काम बाकी आहे.

परिस्थितीची गंभीरता लक्षात घेऊन शासनाने जिल्ह्याच्या नऊही तालुक्यांत दुष्काळसदृश स्थिती जाहीर केली आणि त्यानंतर कृषी विभागाने बाधित क्षेत्राचे पंचनामे सुरू केले. मात्र कामाचा वेग अपेक्षेइतका नसल्याने अंतिम अहवाल तयार होण्यास उशीर होण्याची शक्यता आहे.

गंगाखेड तालुक्यात पंचनाम्यांचे काम शंभर टक्के पूर्ण झाले आहे, तर परभणी तालुका सर्वांत मागे आहे. या तालुक्यातील १३२ गावांत १ लाख ८३८.६० हेक्टरचे पंचनामे अपेक्षित असून त्यापैकी ४३ हजार २१२.८४ हेक्टरचे काम पूर्ण झाले आहे. आणखी १६ हजार ६९३ हेक्टरचे काम सुरू असून ४० हजार ९३२.७६ हेक्टरवर अद्याप प्रक्रियाच सुरू झालेली नाही.

माहिती स्रोत: सकाळ