केंद्रीय पथकाची धाराशिव जिल्ह्यात सहा ठिकाणी पाहणी; ‘दुष्काळाने सगळे हिरावले, जनावरांना चारा नाही’

धाराशिव : दुष्काळी परिस्थितीची प्रत्यक्ष पाहणी करण्यासाठी केंद्रीय पथकाने शनिवारी (ता. १०) धाराशिव जिल्ह्यात सहा ठिकाणी भेटी दिल्या. केंद्रीय पशुसंवर्धन आणि दुग्धव्यवसाय विभागातील पशुधन विकास अधिकारी डॉ. साक्षी भदोरिया आणि नीती आयोगाचे सल्लागार डॉ. जसपाल सिंग हे या पथकात होते. जिल्हाधिकारी कीर्तिकिरण पुजार, जिल्हा परिषदेच्या मुख्य कार्यकारी अधिकारी प्रियवंदा म्हाडदळकर आणि कृषी सहसंचालक महेश तीर्थकर पथकासोबत होते.

धाराशिव तालुक्यातील करजखेडा येथे पथकाने पिकांचे नुकसान, पाणी आणि चाऱ्याच्या स्थितीचा आढावा घेतला. गेल्या दोन वर्षांत अतिवृष्टीने आणि यंदा दुष्काळाने पिके गेल्याचे शेतकऱ्यांनी सांगितले. जेमतेम महिनाभर पुरेल इतकाच चारा उरला असून शेतीवरचा खर्च वाया गेल्याने कर्जाचा बोजा वाढल्याची व्यथा त्यांनी मांडली.

‘या दुष्काळाने सगळे हिरावून घेतले. पेरणीचा खर्चही निघणार नाही, सोयाबीन काढायलाही पैसे नाहीत आणि दहा जनावरांना खायला चारा नाही,’ असे भूम तालुक्यातील हाडोंग्री येथील शेतकरी सुधीर क्षीरसागर यांनी पथकाला सांगितले. दुष्काळामुळे चोऱ्या वाढल्याचे सांगत किमान चारा तरी उपलब्ध करून द्यावा, अशी मागणी हाडोंग्रीतील शेतकऱ्यांनी केली. वाशी तालुक्यातील खानापूर येथील द्राक्ष उत्पादक दिगंबर नकाते यांनी पाण्याअभावी बाग वाचवण्यासाठीची धडपड मांडली.

खासदार ओमप्रकाश राजेनिंबाळकर यांनी जिल्ह्याची स्थिती पाहता केंद्र आणि राज्याने तातडीने पावले उचलावीत आणि शेतकरी कुटुंबांना खास आर्थिक मदत जाहीर करावी, अशी मागणी केली. केवळ पाहणी आणि दौरे न करता शेतकऱ्यांना तातडीने मदत द्यावी, सरकारला केवळ ‘इव्हेंट’ करण्याची सवय लागली आहे, अशी टीका आमदार कैलास पाटील यांनी केली.

माहिती स्रोत: सकाळ