केंद्रीय दुष्काळ पथकाची कर्जत तालुक्यात पाहणी; ‘केवळ ३० टक्के पाऊस, हेक्टरी ५० हजार द्या’ अशी मागणी

कर्जत : खरीप हंगामातील पावसाची कमतरता आणि दुष्काळसदृश स्थितीची प्रत्यक्ष पाहणी करण्यासाठी केंद्र सरकारचे पथक शुक्रवारी (ता. ९) कर्जत तालुक्यात आले. पथकाने टाकळी खंडेश्वरी, चिंचोली काळदात, माही जळगाव, वालवड आणि रेहकुरी परिसरातील शेतांना भेट देऊन पिकांचे नुकसान, फळबागांची अवस्था आणि जनावरांसाठीच्या चाऱ्याची स्थिती जाणून घेतली.

केंद्रीय कृषी आणि शेतकरी कल्याण विभागाचे संचालक डॉ. के. पुन्नुस्वामी यांच्या नेतृत्वाखालील या पथकात अन्न आणि सार्वजनिक वितरण विभागातील सहायक संचालक सुमित शर्मा आणि पाणीपुरवठा-स्वच्छता विभागातील अबसार अहमद खान यांचा समावेश होता. राज्याचे कृषी आयुक्त सूरज मांढरे, अपर जिल्हाधिकारी शैलेश हिंगे, जिल्हा परिषदेचे मुख्य कार्यकारी अधिकारी आनंद भंडारी आणि जिल्हा अधीक्षक कृषी अधिकारी सुधाकर बोराळे यांच्यासह तालुक्यातील अधिकारी उपस्थित होते.

शेतातील पिके करपली, फळबागा सुकल्या, तलाव कोरडे पडले आणि जनावरांच्या चारा-पाण्याचा प्रश्न गंभीर झाल्याचे शेतकऱ्यांनी पथकाला सांगितले. ‘साहेब, होत्याचं नव्हतं झालं, आता तुम्हीच आमचे देव’ अशा शब्दांत त्यांनी मदतीची याचना केली. नुकसान पाहून पथकातील काही अधिकारीही हेलावले.

राष्ट्रवादी काँग्रेस (शरदचंद्र पवार) पक्षाचे तालुकाध्यक्ष रघुआबा काळदाते यांनी यंदा केवळ ३० टक्के पाऊस झाल्याचे सांगत शेतकऱ्यांना हेक्टरी ५० हजार रुपये भरपाई देण्याची मागणी केली. काँग्रेसचे जिल्हाध्यक्ष किरण पाटील यांनी १९९० च्या दशकात ठरलेल्या माणशी २० लिटरच्या ग्रामीण पाणीपुरवठा निकषाचा फेरविचार करण्याची मागणी केली. चारा छावण्या, चारा डेपो किंवा थेट खात्यात पैसे, अशा कोणत्याही स्वरूपात पण तातडीने मदत द्यावी, असेही शेतकऱ्यांनी सांगितले.

पथकाने अहिल्यानगर तालुक्यातही पाहणी केली. चास येथे सोयाबीन, बाजरी आणि कांद्याच्या पिकांची, तर निमगाव वाघा येथे देवी तलावाची पाहणी करण्यात आली. पावसाअभावी पिकांची वाढ खुंटल्याचे आणि तलावात पुरेसे पाणी नसल्याने शेती अडचणीत आल्याचे शेतकऱ्यांनी सांगितले. जनावरांसाठी चारा आणि पाणी विकत घ्यावे लागत असल्याने पंचनामे लवकर पूर्ण करून आर्थिक मदत द्यावी, अशी मागणी त्यांनी केली.

माहिती स्रोत: पुढारी