सोलापुरात ‘नाट्यपरिषद करंडक २०२६’ एकांकिका स्पर्धेच्या प्राथमिक फेरीला प्रारंभ

सोलापूर : नवोदित कलावंतांना व्यासपीठ देणाऱ्या अखिल भारतीय मराठी नाट्य परिषदेच्या (मुंबई) राज्यस्तरीय ‘नाट्यपरिषद करंडक २०२६’ एकांकिका स्पर्धेच्या प्राथमिक फेरीला शनिवारी (१० ऑक्टोबर) सोलापुरातील मुळे सभागृहात सुरुवात झाली. नाट्य परिषदेच्या सोलापूर शाखेचे अध्यक्ष प्रकाश यलगुलवार यांच्या हस्ते उद्घाटन झाले, तर ॲड. बसवराज सलगर प्रमुख पाहुणे होते.

राज्यातील विविध केंद्रांवर ही स्पर्धा सुरू असून प्राथमिक फेरीत सर्वाधिक एकांकिका सोलापूर केंद्रावर सादर होणार आहेत, अशी माहिती उपनगरीय शाखेचे अध्यक्ष विजयकुमार साळुंके यांनी प्रास्ताविकात दिली. स्थानिक कलावंतांचा उत्स्फूर्त सहभाग आणि शहराची नाट्यपरंपरा यामुळे सोलापूर केंद्राकडे लक्ष लागले आहे.

सोलापूर ही कलावंतांची भूमी असून या स्पर्धेतून उत्तम अभिनेते, लेखक, दिग्दर्शक आणि तंत्रज्ञ घडतील, असा विश्वास यलगुलवार यांनी अध्यक्षीय भाषणात व्यक्त केला. ॲड. सलगर यांनी सहभागी कलावंतांना शुभेच्छा दिल्या.

या वेळी बार्शी शाखेचे अध्यक्ष सोमेश्वर घाणेगावकर, महानगर शाखेचे अध्यक्ष प्रा. अजय दासरी, पंढरपूर शाखेचे दत्तात्रय जगताप, मंगळवेढा शाखेचे यतिराज वाकळे आणि स्पर्धेचे केंद्रप्रमुख सुमीत फुलमामडी यांच्यासह पदाधिकारी उपस्थित होते.

माहिती स्रोत: सकाळ