कृत्रिम बुद्धिमत्तेच्या युगातही वाचनसंस्कृती जपा: जयकुमार रावल; धुळ्यात जिल्हा मराठी-अहिराणी साहित्य संमेलन

धुळे : कृत्रिम बुद्धिमत्तेमुळे माहिती एका क्लिकवर मिळते; पण त्या माहितीचे ज्ञान व्हायचे असेल तर वाचन, लेखन, मनन आणि स्वतंत्र विचारांची सवय टिकवावी लागेल, असे प्रतिपादन पणन व राजशिष्टाचारमंत्री आणि जिल्ह्याचे पालकमंत्री जयकुमार रावल यांनी केले. विद्यावर्धिनी महाविद्यालयातील प्राचार्य सदाशिवराव माळी साहित्यनगरीत झालेल्या सहाव्या जिल्हा मराठी साहित्य संमेलन आणि अहिराणी साहित्य संमेलनाचे उद्घाटन त्यांच्या हस्ते झाले.

जिल्हा साहित्य संमेलनाचे अनुदान एक लाखावरून पाच लाख रुपये केल्याचे रावल यांनी सांगितले. जिल्हा नियोजन समितीतून दरवर्षी आणखी पाच लाख आणि अहिराणी पुस्तकांच्या छपाईसाठी अडीच लाख रुपये देण्याची घोषणा करत त्यांनी शहरात ग्रंथालय आणि सभागृह असलेले ‘अहिराणी भाषा व साहित्य संवर्धन केंद्र’ उभारण्याचा संकल्पही मांडला. अहिराणी ही खानदेशची संस्कृती आणि अस्मिता असल्याचे ते म्हणाले.

भाषा हे केवळ अभिव्यक्तीचे साधन नसून समाजाची संस्कृती, परंपरा आणि अस्मिता जपणारी शक्ती आहे; मराठी आणि अहिराणीचा वारसा नव्या पिढीपर्यंत पोहोचवणे ही सामूहिक जबाबदारी आहे, असे संमेलनाध्यक्ष प्रा. एल. जी. सोनवणे म्हणाले.

संमेलनात स्मरणिकेसह ‘अक्षयगंध’ आणि ‘पायजा’ या ग्रंथांचे प्रकाशन झाले, तसेच ‘साहित्यिकांचे गाव’ प्रदर्शनाचे उद्घाटन झाले. साहित्यातील योगदानाबद्दल कवी प्र. अ. पुराणिक आणि ज्येष्ठ साहित्यिक प्राचार्य डॉ. क. उ. संघवी यांना जीवनगौरव पुरस्कार देण्यात आला. महापौर मायादेवी परदेशी, स्वागताध्यक्ष आमदार अनुप अग्रवाल आणि माजी केंद्रीय मंत्री डॉ. सुभाष भामरे उपस्थित होते.

माहिती स्रोत: सकाळ