उजनी जलाशयावरील चारही प्रस्तावित प्रकल्पांना आमदार नारायण पाटील यांचा विरोध

सोलापूर : आमदार नारायण (आबा) पाटील यांनी उजनी जलाशयावर आणि त्याच्या परिसरात येऊ घातलेल्या चार मोठ्या प्रकल्पांना विरोध केला आहे. तरंगता सौरऊर्जा प्रकल्प, एआय डेटा सेंटर आणि कॅम्पस, ग्रीन हायड्रोजन प्रकल्प आणि स्मॉल मॉड्यूलर रिॲक्टर (लहान अणुभट्टी) या प्रकल्पांवर त्यांनी हरकत नोंदवल्याचे पाटील गटाचे प्रवक्ते सुनील तळेकर यांनी रविवारी सांगितले.

या प्रकल्पांबाबत गेल्या आठवड्यात बैठक झाली होती; मात्र विद्यमान आमदार असूनही नारायण पाटील यांना तिचे निमंत्रण मिळाले नाही, असा आरोप पाटील गटाने केला आहे. संबंधित विभागाकडून बैठकीबाबत कोणताही ई-मेल किंवा फोन आला नाही, असे तळेकर यांनी सांगितले.

प्रकल्पांची माहिती मिळताच पाटील यांनी तातडीने हरकत नोंदवून आपली भूमिका स्पष्ट केल्याचे या गटाचे म्हणणे आहे. प्रकल्पांना विरोध करणारे निवेदन मुख्यमंत्री देवेंद्र फडणवीस आणि जलसंपदामंत्री राधाकृष्ण विखे-पाटील यांना पाठवण्यात आले आहे.

या हरकतीनंतर राज्य सरकार आणि संबंधित विभाग काय भूमिका घेतात, याकडे आता लक्ष लागले आहे.

माहिती स्रोत: हिंदुस्थान समाचार