कल्याणकारी मंडळ तातडीने सुरू करा; बुलढाण्यात वृत्तपत्र विक्रेत्यांचा जिल्हाधिकारी कार्यालयावर मोर्चा

बुलढाणा : वृत्तपत्र विक्रेत्यांसाठी शासनाने मंजूर केलेले स्वतंत्र कल्याणकारी मंडळ तातडीने कार्यान्वित करावे, यासह इतर मागण्यांसाठी महाराष्ट्र राज्य वृत्तपत्र विक्रेता संघटनेने राज्यभर आंदोलन केले. त्याचाच भाग म्हणून बुलढाणा जिल्हा वृत्तपत्र विक्रेता संघटनेने ९ ऑक्टोबरला जिल्हाधिकारी कार्यालयावर मोर्चा काढला.

शहरातील जयस्तंभ चौकातून निघालेला हा मोर्चा जिल्हाधिकारी कार्यालयावर धडकला. जिल्हाभरातून आलेले शेकडो विक्रेते घोषणा देत त्यात सहभागी झाले. संघटनेच्या पदाधिकाऱ्यांनी मागण्यांचे सविस्तर निवेदन जिल्हाधिकाऱ्यांना सादर केले.

विक्रेत्यांच्या न्याय्य हक्कांसाठी आणि कल्याणकारी महामंडळासाठी संघटना गेली १६-१७ वर्षे लढा देत आहे. मंत्रिमंडळाने महामंडळ स्थापनेचा निर्णय घेतला, मात्र मंजुरीनंतरही त्याची प्रत्यक्ष अंमलबजावणी झालेली नाही, असे निवेदनात म्हटले आहे. महामंडळ लवकर कार्यान्वित करून विक्रेत्यांना दिलासा द्यावा, अशी संघटनेची मागणी आहे.

मोर्चात जिल्हाध्यक्ष राजेंद्र टिकार, जिल्हा सचिव गजानन सरकटे, उपाध्यक्ष संजय स्वामी, कोषाध्यक्ष माधव देशमुख, विभागीय सचिव प्रकाश उन्हाळे, प्रसिद्धिप्रमुख संतोष गाडेकर यांच्यासह कार्यकारिणीचे सदस्य आणि जिल्ह्यातील विक्रेते सहभागी झाले.

माहिती स्रोत: तरुण भारत