नवरात्रोत्सवासाठी अमरावतीत दोन हजारांहून अधिक पोलीस; जिल्ह्यात २,५८३ मंडळांत देवीची स्थापना

अमरावती : नवरात्रोत्सव, दुर्गा व शारदा देवीची स्थापना, गरबा आणि विसर्जन मिरवणुकांच्या काळात शांततापूर्ण आणि सुरक्षित वातावरण राहावे, यासाठी शहर पोलीस आयुक्तालय आणि ग्रामीण पोलिसांनी कडक बंदोबस्ताचे नियोजन केले आहे. रविवारी (ता. ११) शहरासह जिल्ह्यात २,५८३ सार्वजनिक मंडळांत देवीची स्थापना होत आहे. शहरात सुमारे ५८५ ठिकाणी सार्वजनिक स्थापना होणार असून ६९ ठिकाणी गरबा होणार आहे.

शहरात तीन पोलीस उपायुक्त, चार सहायक आयुक्त, २८ पोलीस निरीक्षक, ७० सहायक निरीक्षक व उपनिरीक्षक आणि १,६५० पोलीस कर्मचारी असे दोन हजारांहून अधिक पोलीस तैनात असतील. शिवाय आरसीपी व क्यूआरटी पथके, एसआरपीएफची एक कंपनी आणि होमगार्ड असतील. संवेदनशील भाग, प्रमुख चौक आणि गर्दीच्या ठिकाणी नाके उभारले जातील. समाज माध्यमांवर अफवा किंवा चिथावणीखोर मजकूर पसरवणाऱ्यांवर कठोर कारवाईचा इशारा पोलीस आयुक्त राकेश ओला यांनी दिला आहे. ग्रामीण भागात १,७०९ दुर्गा आणि २८९ शारदा मूर्तींची स्थापना होणार असून त्यात ‘एक गाव, एक दुर्गा’ उपक्रमांतर्गत ३९५ आणि ‘एक गाव, एक शारदा’ अंतर्गत ९६ ठिकाणांचा समावेश आहे.

अंबादेवी आणि एकवीरा देवी मंदिर परिसरातील गर्दी लक्षात घेऊन शहर वाहतूक पोलिसांनी २० ऑक्टोबरच्या रात्री बारापर्यंत शहरातील नऊ प्रमुख मार्ग सर्व वाहनांसाठी बंद केले आहेत. यात राजकमल चौक ते अंबादेवी, साबनपुरा खिडकी ते गांधी चौक आणि ओसवाल भवन ते गांधी चौक या मार्गांचा समावेश आहे. वाहनचालकांनी पर्यायी मार्गांचा वापर करावा, असे आवाहन सहायक पोलीस आयुक्त (वाहतूक) संजय बताले यांनी केले आहे.

माहिती स्रोत: हिंदुस्थान समाचार; हिंदुस्थान समाचार