सोलापुरात तरुणांसाठी ‘जेन झी ई-कट्टा’; राज्यातील तिसरे नेक्स्ट जनरेशन टपाल कार्यालय सुरू

सोलापूर : तरुणाईला टपाल विभागाच्या आधुनिक सेवांकडे वळवण्यासाठी मुंबई आणि पुण्यानंतर राज्यातील तिसरे ‘नेक्स्ट जनरेशन’ टपाल कार्यालय सोलापुरात सुरू होत आहे. गुरुनानक चौकातील टपाल कार्यालयात ‘जेन झी ई-कट्टा’ या नावाने हे दालन शुक्रवारी (९ ऑक्टोबर), टपाल दिनी खुले होत आहे. राज्याच्या पोस्टमास्टर जनरल प्रीती अग्रवाल यांच्या उपस्थितीत उद्घाटन होणार आहे.

सुमारे ३०० चौरस फुटांच्या या दालनाची रचना वास्तुकला महाविद्यालयाच्या विद्यार्थ्यांनी एखाद्या कॅफेसारखी केली आहे. तेथे मोफत वेगवान वायफाय, मोबाइल चार्जिंग, वातानुकूलित बैठक, इनडोअर खेळ, वाचनाची सोय तसेच डूडल आणि ॲनिमेशन कलाकृती आहेत. सोलापूरची ओळख असलेल्या विठ्ठल आणि नंदीध्वजांच्या प्रतिमांसह सेल्फी पॉइंटही उभारण्यात आला आहे.

पार्सल पॅकिंग, ई-कॉमर्स बुकिंग, यूपीआय पेमेंट, ई-केवायसी, आधार अद्ययावत करणे, आंतरराष्ट्रीय टपाल, गुंतवणूक सेवा आणि टपाल जीवन विमा या सेवा येथे डिजिटल पद्धतीने मिळतील. क्यूआर कोड स्कॅन करून अनेक कामे रांगेत न थांबता मोबाइलवरूनच पूर्ण करता येतील आणि बहुतांश कामे १० ते १५ मिनिटांत व्हावीत, असे उद्दिष्ट आहे.

तरुणांसाठी टपाल विभागाचा हा वेगळा प्रयोग असल्याचे मुख्य डाकघराचे प्रवर अधीक्षक हेमंत खडकीकर यांनी सांगितले.

माहिती स्रोत: पुढारी