शिक्षक मिळेनात म्हणून संतप्त पालकांनी वायगावच्या जिल्हा परिषद शाळेला ठोकले कुलूप

अमरावती : जिल्हा परिषद शाळेतील शिक्षकांची कमतरता दूर करावी, या मागणीकडे शासन आणि प्रशासन दुर्लक्ष करत असल्याच्या निषेधार्थ वायगाव येथील संतप्त पालक, शाळा व्यवस्थापन समिती आणि गावातील युवा प्रतिनिधींनी शनिवारी (ता. १०) सकाळी शाळेलाच कुलूप ठोकले. या आंदोलनामुळे ग्रामीण भागातील शालेय शिक्षणाचा प्रश्न पुन्हा चर्चेत आला आहे.

वायगावच्या जिल्हा परिषद प्राथमिक शाळेत विद्यार्थ्यांची संख्या चांगली आहे; मात्र गेल्या अनेक महिन्यांपासून आवश्यक तेवढे शिक्षक नाहीत. मोजक्या शिक्षकांवर सर्व वर्गांचा भार पडत असल्याने विद्यार्थ्यांचे शैक्षणिक नुकसान होत असून गुणवत्तेवर परिणाम होत आहे, असे पालकांचे म्हणणे आहे.

रिक्त पदे तातडीने भरावीत, यासाठी शाळा व्यवस्थापन समिती, पालक आणि स्थानिक लोकप्रतिनिधींनी शिक्षण विभागाच्या वरिष्ठ अधिकाऱ्यांना वारंवार निवेदने दिली आणि प्रत्यक्ष भेटीही घेतल्या. मात्र प्रत्येक वेळी केवळ आश्वासने मिळाली आणि एकाही नव्या शिक्षकाची नियुक्ती झाली नाही, असा आरोप आंदोलकांनी केला. विद्यार्थ्यांचे शैक्षणिक नुकसान होत असताना आश्वासनांचा उपयोग काय, असा सवालही पालकांनी केला.

माहिती स्रोत: हिंदुस्थान समाचार