आयआयटी रोपडची पहिली ‘एमटेक (संरक्षण तंत्रज्ञान)’ पदवी अहिल्यानगरमधील ५९ लष्करी अधिकाऱ्यांना प्रदान

अहिल्यानगर : पंजाबमधील भारतीय तंत्रज्ञान संस्था (आयआयटी) रोपडने शुक्रवारी (ता. ९) अहिल्यानगर येथील आर्मर्ड कोअर सेंटर अँड स्कूलमधील (एसीसी अँड एस) ५९ अधिकाऱ्यांना संरक्षण तंत्रज्ञानातील एमटेक पदवी प्रदान केली. लष्करी उपयोजनांवर आधारित संस्थेच्या पहिल्या पदव्युत्तर अभ्यासक्रमाची ही पहिलीच तुकडी आहे. आयआयटी रोपडचे संचालक राजीव आहुजा यांच्या हस्ते एसीसी अँड एस येथे पदव्या देण्यात आल्या.

आयआयटी रोपड आणि एसीसी अँड एस यांनी हा अभ्यासक्रम एकत्रितपणे तयार केला आहे. संरक्षणविषयक उपयोग, उपयोजित संशोधन आणि तंत्रज्ञानाधारित उपायांवर त्याचा भर असून सशस्त्र दलांचे आधुनिकीकरण आणि स्वदेशीकरणाला बळ देणे हा त्याचा उद्देश आहे. लष्करी वापरासाठीच खास आखलेली प्रगत पदव्युत्तर पदवी एखाद्या आयआयटीने देण्याची ही पहिलीच वेळ आहे.

‘आज वर्गातील ज्ञान रणांगणाला भेटत आहे,’ असे आहुजा या वेळी म्हणाले. हे अधिकारी देशाला स्वतःचे संरक्षण तंत्रज्ञान विकसित करण्यास मदत करतील, असेही त्यांनी सांगितले.

अभ्यासक्रमात प्रत्यक्ष उपयोजन, संशोधन आणि समस्या सोडवण्याच्या कौशल्यांवर भर असून लष्कराच्या गरजांशी शैक्षणिक प्रशिक्षणाची सांगड घालण्यात आली आहे. पदवीधर अधिकाऱ्यांनी आर्मर्ड तुकड्यांमध्ये तंत्रज्ञानाच्या आधुनिकीकरणाचे नेतृत्व करावे आणि संरक्षण उत्पादनातील स्वदेशीकरणाला हातभार लावावा, अशी अपेक्षा आहे.

दोन्ही संस्थांमधील करारामुळे संयुक्त संशोधन आणि विकासाची चौकटही तयार झाली आहे. त्यात आर्मर्ड वाहनांचे तंत्रज्ञान, प्रगत शस्त्रास्त्रे आणि नवे साहित्य (मटेरियल्स) यांचा समावेश आहे. संरक्षण क्षेत्रातील आत्मनिर्भरता आणि ‘विकसित भारत २०४७’च्या उद्दिष्टांना हा उपक्रम पूरक असल्याचे सांगण्यात आले.

माहिती स्रोत: हिंदुस्तान टाइम्स