शासकीय निवासी शाळांतील विद्यार्थ्यांनी जाणून घेतले अंतराळ तंत्रज्ञान; गोंदियात कार्यशाळा

गोंदिया : विद्यार्थ्यांमध्ये विज्ञानाविषयी उत्सुकता निर्माण व्हावी आणि अंतराळ तंत्रज्ञानातील करिअरच्या संधींची माहिती मिळावी, यासाठी समाज कल्याण सहायक आयुक्त कार्यालय आणि शिक्षा बहुउद्देशीय संस्था यांच्या वतीने ‘सेवा संकल्प’ अभियानांतर्गत ९ ऑक्टोबरला जिल्हा नियोजन भवनात ‘अंतराळ तंत्रज्ञानाची ओळख’ ही कार्यशाळा झाली. शासकीय निवासी शाळा आणि वसतिगृहांतील विद्यार्थी त्यात सहभागी झाले.

जिल्हा नियोजन अधिकारी डॉ. रुपेशकुमार राऊत यांनी विद्यार्थ्यांशी प्रश्नोत्तरांतून संवाद साधला. या क्षेत्रात करिअर करायचे असल्यास गणित, भौतिकशास्त्र आणि रसायनशास्त्रावर प्रभुत्व हवे, असे सांगत त्यांनी विद्यार्थ्यांना ध्येय निश्चित करून सातत्याने प्रयत्न करण्याचे आवाहन केले. नावीन्यपूर्ण योजनेत एका प्रकल्पासाठी कमाल तीन कोटी रुपयांची मर्यादा असते आणि या योजनेतून विद्यार्थी नासासारख्या ठिकाणी भेट देऊ शकतात, असेही ते म्हणाले.

जिल्हा माहिती अधिकारी अंजु निमसरकर यांनी पृथ्वीची निर्मिती, मानवी जीवनशैलीतील बदल आणि वैज्ञानिक संशोधनाच्या विकासाविषयी माहिती देत दैनंदिन घटनांकडे वैज्ञानिक दृष्टीने पाहण्याचे आवाहन केले. महाराष्ट्र रिमोट सेन्सिंग ॲप्लिकेशन सेंटरचे (नागपूर) सहायक शास्त्रज्ञ अशोक मेडपल्लीवार, समाज कल्याण सहायक आयुक्त किशोर भोयर आदी उपस्थित होते. उपग्रहांचा दैनंदिन जीवन, शेती, नकाशे आणि भूगर्भशास्त्रासाठी होणारा उपयोग विद्यार्थ्यांना समजावून सांगण्यात आला.

माहिती स्रोत: बऱ्हाड टाइम्स