नांदेडमध्ये रब्बी हंगामासाठी ७,७८४ क्विंटल प्रमाणित बियाण्यांचे नियोजन; हरभऱ्यावर भर

नांदेड : आगामी रब्बी हंगामासाठी जिल्हा कृषी विभागाने बियाणे कार्यक्रमाचे नियोजन केले आहे. प्रमाणित बियाणे वितरणासाठी ७,७८४.४२ क्विंटल आणि पीक प्रात्यक्षिकांसाठी २,४७५ क्विंटल बियाणे उपलब्ध करून देण्याचे नियोजन असून हरभरा, ज्वारी, करडई, गहू आणि मका या पिकांचा त्यात समावेश आहे.

प्रमाणित बियाणे वितरणासाठी ३७५.७२ लाख रुपयांची तरतूद आहे. त्यात सर्वाधिक ४,०२८.६७ क्विंटल बियाणे हरभऱ्याचे असून त्यासाठी २४१.७२ लाख रुपये प्रस्तावित आहेत. ज्वारीसाठी १,८७८.७५ क्विंटल, मक्याच्या विविध वाणांसाठी मिळून १,७५७ क्विंटल आणि करडईसाठी १२० क्विंटल बियाणे नियोजित आहे.

पीक प्रात्यक्षिकांचे बियाणे शेतकरी उत्पादक कंपन्या, शेतकरी गट आणि शेतीशी संबंधित सहकारी संस्थांना दिले जाईल. त्यात हरभऱ्याचे ८५० क्विंटल (८५ लाख रुपयांची तरतूद), ज्वारीचे ८७०, गव्हाचे ३३५, करडईचे ३०० आणि मक्याचे १२० क्विंटल बियाणे आहे. सुधारित वाण शेतकऱ्यांपर्यंत पोहोचवणे, उत्पादकता वाढवणे आणि प्रात्यक्षिकांतून आधुनिक तंत्रज्ञानाचा प्रसार करणे, हा या कार्यक्रमाचा उद्देश असल्याचे कृषी विभागाच्या सूत्रांनी सांगितले.

माहिती स्रोत: ॲग्रोवन