जालना बाजार समितीत पांढऱ्या तुरीला १०,६५० रुपयांचा हंगामातील उच्चांकी दर

जालना : जालना कृषी उत्पन्न बाजार समितीत शुक्रवारी (ता. ९) झालेल्या लिलावात पांढऱ्या तुरीला प्रतिक्विंटल कमाल १० हजार ६५० रुपये भाव मिळाला. हा या हंगामातील उच्चांकी दर आहे. पांढऱ्या तुरीला किमान ६,०११ रुपये आणि सर्वसाधारण ९,५०० रुपये दर होता.

बाजार समितीच्या दैनंदिन आढाव्यानुसार त्या दिवशी एकूण ९,९४९ क्विंटल शेतमालाची आवक झाली आणि एकाच दिवसात ६ कोटी ५ लाख १७ हजार ४४८ रुपयांची उलाढाल झाली. आवकेत पिवळ्या सोयाबीनचा वाटा सर्वाधिक होता. सोयाबीनची ७,९६७ क्विंटल अशी विक्रमी आवक झाली आणि त्याला सर्वसाधारण ६,५०० रुपये प्रतिक्विंटल भाव मिळाला.

कडधान्यांपैकी काळ्या उडदाला कमाल ९,६०० रुपये, तर ३७ क्विंटल आवक झालेल्या चमकी मुगाला कमाल ९,४०० रुपये प्रतिक्विंटल भाव मिळाला. गावरान हरभरा ७,४०० रुपयांपर्यंत विकला गेला. धान्यांमध्ये शाळू ज्वारीला चांगली मागणी होती; ५९६ क्विंटल आवक झालेल्या शाळू ज्वारीला कमाल ६,८०० रुपये दर मिळाला.

माहिती स्रोत: पुढारी