अक्कलकुव्यातील २५ आदिवासी गावांतील समूह विहीर सिंचन प्रकल्पाला राष्ट्रीय जलव्यवस्थापन पुरस्कार

नंदुरबार : अक्कलकुवा तालुक्यातील २५ आदिवासी गावांत राबवलेल्या ‘समूह विहीर सिंचन प्रणालीद्वारे आदिवासी कुटुंबांचा उपजीविका विकास’ या प्रकल्पाने राष्ट्रीय स्तरावरील ‘सीआयआय नॅशनल अवॉर्ड फॉर एक्सलन्स इन वॉटर मॅनेजमेंट – २०२६’ पटकावला आहे. लूपिन ह्युमन वेल्फेअर अँड रिसर्च फाउंडेशनने ॲटलस कॉप्को इंडियाच्या आर्थिक सहकार्याने हा उपक्रम राबवला.

कॉन्फेडरेशन ऑफ इंडियन इंडस्ट्री आणि सीआयआय-त्रिवेणी वॉटर इन्स्टिट्यूटतर्फे नवी दिल्लीत झालेल्या १२ व्या ‘वॉटर इनोव्हेशन समिट २०२६’ मध्ये ‘बियॉण्ड द फेन्स’ श्रेणीत प्रकल्पाला हा पुरस्कार देण्यात आला. पुरस्कार स्वीकारताना फाउंडेशनतर्फे उपजीविका विभागाचे जिल्हा व्यवस्थापक नीलेश पवार आणि सीएसआर विभागाचे उपमहाव्यवस्थापक योगेश राऊत उपस्थित होते.

आदिवासी आणि अल्पभूधारक शेतकऱ्यांना शाश्वत सिंचन मिळावे, म्हणून पाच-सहा कुटुंबांचे गट करून त्यांच्यासाठी सामूहिक विहीर, पंपसंच आणि पाणी वितरण व्यवस्था उभारण्यात आली. २५ गावांत १०० समूह विहिरी तयार झाल्या असून ५०० आदिवासी कुटुंबांना थेट सिंचनाचा लाभ मिळाला आहे आणि सुमारे एक हजार एकर कोरडवाहू जमीन सिंचनाखाली आली आहे.

वर्षभर शेती करता येऊ लागल्याने हंगामी स्थलांतर घटले आणि उत्पन्न वाढले, असे फाउंडेशनने सांगितले. नंदुरबारमध्ये विकसित झालेले हे मॉडेल इतर आदिवासी आणि ग्रामीण भागांसाठी प्रेरणादायी ठरेल, असा विश्वास फाउंडेशनच्या प्रतिनिधींनी व्यक्त केला.

माहिती स्रोत: सकाळ