ज्येष्ठ नाटककार सई परांजपे यांना विष्णुदास भावे गौरव पदक जाहीर

सांगली : रंगभूमी आणि नाट्यलेखनात मोलाचे योगदान देणाऱ्या ज्येष्ठ नाटककार, लेखिका आणि दिग्दर्शिका सई परांजपे यांना यंदाचे विष्णुदास भावे गौरव पदक जाहीर झाले आहे. अखिल महाराष्ट्र नाट्य विद्यामंदिर समितीतर्फे ५ नोव्हेंबरला, रंगभूमी दिनी सांगलीत होणाऱ्या कार्यक्रमात नाट्य संमेलनाचे अध्यक्ष मोहन जोशी यांच्या हस्ते हा सन्मान प्रदान केला जाईल.

पदक, ३० हजार रुपये रोख, स्मृतिचिन्ह, शाल आणि श्रीफळ असे पुरस्काराचे स्वरूप आहे, अशी माहिती समितीचे अध्यक्ष डॉ. शरद कराळे यांनी पत्रकारांना दिली.

सई परांजपे यांचे पहिले बालसाहित्याचे पुस्तक ‘मुलांचा मेवा’ त्या आठ वर्षांच्या असताना प्रसिद्ध झाले. आई शकुंतला परांजपे आणि आजोबा र. पु. परांजपे यांच्याकडून त्यांना प्रोत्साहन मिळाले. ‘जादूचा शंख’, ‘पत्ते नगरीत’, ‘शेपटीचा शाप’ यांसह नऊ बालनाटके त्यांनी लिहिली, तर ‘माझा खेळ मांडू दे’, ‘सोयरीक’, ‘सख्खे शेजारी’ आणि ‘जास्वंदी’ ही त्यांची प्रौढ रंगभूमीवरील नाटके गाजली. ‘जास्वंदी’ला १९७८ मध्ये राज्य शासनाचा उत्कृष्ट निर्मितीचा पुरस्कार मिळाला होता.

दिल्लीत असताना त्यांनी ‘एक तमाशा अच्छा खासा’ आणि ‘धिक् ताम’ ही तमाशाधर्मी नाटके लिहून दिग्दर्शित केली आणि महाराष्ट्राची ही लोककला तेथील रंगमंचावर नेली. पती अरुण जोगळेकर यांच्यासोबत ‘नाट्यद्वयी’ संस्थेतून त्यांनी प्रयोगशील नाटके केली. विजय तेंडुलकरांच्या ‘गिधाडे’चे ‘गिद्ध’ हे हिंदी रूपांतरही त्यांनी केले. केंद्र सरकारने २००६ मध्ये त्यांना पद्मभूषणने सन्मानित केले आहे.

माहिती स्रोत: प्रहार