जातनिहाय जनगणनेत ओबीसींसाठी स्वतंत्र रकान्याची मागणी; २५ ऑक्टोबरला गोंदियात महामोर्चा

गोंदिया : देशात होणाऱ्या आगामी जातनिहाय जनगणनेत इतर मागासवर्गीयांसाठी (ओबीसी) स्वतंत्र रकाना असावा, या प्रमुख मागणीसाठी २५ ऑक्टोबरला गोंदियात जिल्हास्तरीय ओबीसी महामोर्चा काढण्यात येणार आहे. नोव्हेंबरमध्ये दिल्लीत ‘चलो दिल्ली’ आंदोलन करण्याचाही निर्धार करण्यात आला, असे ‘बऱ्हाड टाइम्स’ने म्हटले आहे.

अखिल भारतीय ओबीसी महासंघ, ओबीसी सेवा संघ, सकल ओबीसी महामोर्चा, ओबीसी संघर्ष कृती समिती यांच्यासह सात संघटनांच्या वतीने येथील शिक्षक सहकारी पतसंस्थेत १० ऑक्टोबरला नियोजन बैठक झाली. मोर्चाची पूर्वतयारी, जनसंपर्क मोहीम आणि दिल्लीतील आंदोलनाच्या नियोजनावर बैठकीत चर्चा झाली.

ओबीसी समाजाची अचूक लोकसंख्या समोर येण्यासाठी जनगणनेत स्वतंत्र रकाना आवश्यक असून केंद्र सरकारने या मागणीची तातडीने दखल घ्यावी, अन्यथा रस्त्यावर उतरून तीव्र लढा उभारला जाईल, असा इशारा पदाधिकाऱ्यांनी दिला. ओबीसी अधिकार मंचाचे संयोजक खेमेंद्र कटरे, ओबीसी संघर्ष कृती समितीचे महासचिव मनोज मेंढे आणि सकल ओबीसी महामोर्चाचे संयोजक उमेश कोर्राम यांच्यासह विविध संघटनांचे पदाधिकारी उपस्थित होते.

माहिती स्रोत: बऱ्हाड टाइम्स