फटाका गोदामाच्या आगीतील जखमींसाठी हिंगोलीत अग्रसेन जयंती साधेपणाने; मिरवणुकीचा खर्च उपचारांसाठी

हिंगोली : शहरात दरवर्षी मोठ्या उत्साहात साजरी होणारी महाराजा श्री अग्रसेन जयंती यंदा रविवारी (ता. ११) साधेपणाने साजरी करण्यात आली. मारवाडी गल्लीतील फटाक्यांच्या गोदामाला लागलेल्या आगीत अग्रवाल समाजातील काहीजण गंभीर भाजले आहेत. त्यामुळे समाजाने जयंतीनिमित्त निघणारी मिरवणूक आणि इतर कार्यक्रम रद्द केले आणि त्यावर होणारा खर्च जळीतग्रस्तांच्या उपचारांसाठी दिला.

सोमवारी (ता. ५) रात्री आठच्या सुमारास मारवाडी गल्लीतील एका घरात ठेवलेल्या फटाक्यांच्या साठ्याला आग लागून स्फोट झाला होता. या दुर्घटनेत तिघांचा मृत्यू झाला, तर १५ जण जखमी झाले. जखमींवर छत्रपती संभाजीनगर, लातूर आणि हिंगोली येथील रुग्णालयांत उपचार करण्यात आले. गंभीर भाजलेल्यांपैकी एकावर अजूनही रुग्णालयात उपचार सुरू असून औषधोपचारांचा खर्च मोठा आहे.

या पार्श्वभूमीवर अग्रवाल समाजाच्या मान्यवरांनी रविवारी महाराजा श्री अग्रसेन यांच्या पुतळ्याचे पूजन करून जयंती साजरी केली. या वेळी समाजातील महिला, पुरुष आणि युवक-युवती मोठ्या संख्येने उपस्थित होते.

माहिती स्रोत: देशोन्नती