‘ड्रग्ज फ्री वर्धा’: पिपरी येथील महाविद्यालयात पोलिसांचा अमली पदार्थविरोधी जनजागृती कार्यक्रम

वर्धा : तरुणांमध्ये वाढत असलेल्या अमली पदार्थांच्या व्यसनाची गंभीर दखल घेत वर्धा जिल्हा पोलिसांनी ‘ड्रग्ज फ्री वर्धा’ अभियान हाती घेतले आहे. त्याअंतर्गत अँटी नार्कोटिक्स टास्क फोर्सने ९ ऑक्टोबरला पिपरी (वर्धा) येथील श्री कृष्णदास जाजू ग्रामीण सेवा महाविद्यालयात अमली पदार्थविरोधी जनजागृती कार्यक्रम घेतला.

जिल्हा पोलिसांनी तयार केलेली एनडीपीएस जनजागृती चित्रफीत आणि सादरीकरणाद्वारे विद्यार्थ्यांना अमली पदार्थांच्या दुष्परिणामांची माहिती देण्यात आली. पोलीस निरीक्षक विनोद चौधरी यांनी मार्गदर्शन केले. महाविद्यालयीन विद्यार्थिनींच्या सुरक्षेबाबत दामिनी पथकातील महिला पोलिसांनी, तर सायबर सुरक्षेबाबत वर्धा सायबर सेलने माहिती दिली.

अमली पदार्थांचे सेवन केवळ शारीरिक व मानसिक आरोग्य बिघडवत नाही, तर गुन्हेगारी प्रवृत्तीलाही चालना देते, असे सांगत विद्यार्थ्यांनी व्यसनांपासून दूर राहावे, असे आवाहन पोलिसांनी केले. सामूहिक राष्ट्रगीताने कार्यक्रमाची सांगता झाली.

माहिती स्रोत: चांदा ब्लास्ट