देवीच्या ज्योती घेऊन तरुण गावांकडे; गेवराई तालुक्यात नवरात्रोत्सवाचा उत्साह

गेवराई : नवरात्रोत्सव जवळ आल्याने गेवराई तालुक्यात भक्तीचा उत्साह वाढला आहे. देवीची ज्योत आणण्यासाठी विविध शक्तिपीठांकडे गेलेले तरुण आता ज्योत घेऊन परतू लागले असून तालुक्यातील रस्त्यांवर ठिकठिकाणी देवीचा जयघोष आणि भक्तिगीतांचा गजर ऐकू येत आहे.

तुळजापूरची तुळजाभवानी, सप्तशृंगी देवी आणि मोहटादेवी यांसह अनेक देवस्थानांहून ज्योत आणण्यासाठी तालुक्यातील तरुणांनी पुढाकार घेतला आहे. लांबचा प्रवास आणि थकवा असूनही ज्योत आपल्या गावात नेण्याची ओढ त्यांच्यात दिसते. परतणाऱ्या या पथकांमुळे तालुक्यातील मार्गांवर वर्दळ वाढली असून ज्योतींच्या स्वागतासाठी गावोगावी तयारी सुरू आहे.

मन्यारवाडी येथील २५ तरुणांचे पथक ८ ऑक्टोबरला सप्तशृंगी देवीची ज्योत आणण्यासाठी रवाना झाले होते. ज्योत घेऊन परतीच्या प्रवासाला लागलेले हे तरुण रविवारी (ता. ११) घटस्थापनेच्या दिवशी गावात दाखल होणार आहेत. घटस्थापनेने त्याच दिवशी नवरात्रोत्सवाला सुरुवात होत असल्याने त्याआधी ज्योती गावात पोहोचवण्यासाठी तरुणांची धावपळ सुरू आहे.

माहिती स्रोत: पुढारी