जयंतीची मिरवणूक रद्द, खर्चाचे ५१ हजार रुपये मुख्यमंत्री सहायता निधीला; बुलढाण्यातील नाभिक समाजाचा निर्णय

बुलढाणा : दुष्काळामुळे अडचणीत आलेल्या शेतकऱ्यांची स्थिती लक्षात घेऊन बुलढाणा शहरातील नाभिक समाजाने यंदा वीररत्न जिवाजी महाले जयंतीची सायंकाळची शोभायात्रा रद्द केली आहे. शोभायात्रेवर होणारा सुमारे ५१ हजार रुपयांचा खर्च शेतकऱ्यांच्या मदतीसाठी मुख्यमंत्री सहायता निधीत जमा करण्याचा निर्णय समाजबांधवांनी घेतला आहे.

छत्रपती शिवाजी महाराजांचे निष्ठावंत अंगरक्षक म्हणून ओळखले जाणारे जिवाजी महाले यांची जयंती ९ ऑक्टोबरला शहरात साजरी झाली. सकाळी दुचाकी रॅली निघाली आणि त्यानंतर समाजाच्या नियोजित सभागृहाच्या जागेवर अभिवादनाचा कार्यक्रम झाला. वीररत्न जिवाजी महाले सार्वजनिक जयंती उत्सव समिती आणि समाजबांधवांनी मदतीच्या निर्णयाला एकमताने मान्यता दिली.

जयंतीनिमित्त दरवर्षी शोभायात्रा निघते; मात्र यंदा शेतकरी दुष्काळाने होरपळत असल्याने मिरवणुकीचा खर्च टाळून ती रक्कम त्यांच्या मदतीसाठी देण्याचे ठरले, असे समाजभूषण दामोदरकाका बिडवे यांनी सांगितले. संकटाच्या काळात शेतकऱ्यांच्या पाठीशी उभे राहणे ही समाज म्हणून जबाबदारी असल्याचे ते म्हणाले.

माहिती स्रोत: बुलडाणा लाइव्ह