बीडच्या तीन खेळाडूंची महाराष्ट्राच्या रणजी संघात निवड; सचिन धस, सौरभ नवले, ऋषिकेश सोनवणे

बीड : देशांतर्गत क्रिकेटमधील प्रतिष्ठेच्या रणजी करंडक स्पर्धेसाठी महाराष्ट्राच्या संघात बीडच्या सचिन धस, सौरभ नवले आणि ऋषिकेश सोनवणे या तिघांची निवड झाली आहे. जिल्ह्यातील तीन खेळाडूंना एकाच वेळी महाराष्ट्राच्या रणजी संघात संधी मिळण्याची ही पहिलीच वेळ असल्याचे बीड जिल्हा क्रिकेट असोसिएशनचे सचिव आमेर सलीम यांनी सांगितले.

महाराष्ट्राचा पहिला सामना ११ ते १४ ऑक्टोबरदरम्यान नवी दिल्लीत सर्व्हिसेसविरुद्ध होणार आहे. नियमित कर्णधार ऋतुराज गायकवाड भारत ‘अ’ संघाच्या सामन्यांमुळे उपलब्ध नसल्याने पहिल्या सामन्यात पृथ्वी शॉ संघाचे नेतृत्व करणार आहे.

त्यानंतर महाराष्ट्राचे सामने १८ ते २१ ऑक्टोबर, २६ ते २९ ऑक्टोबर आणि २ ते ५ नोव्हेंबरदरम्यान होणार आहेत. या निवडीमुळे जिल्ह्यातील क्रिकेटप्रेमींमध्ये आनंदाचे वातावरण असून तिघांना अंतिम अकरा खेळाडूंत संधी मिळते का, याकडे त्यांचे लक्ष लागले आहे.

माहिती स्रोत: सकाळ