अमरावती जिल्हा मध्यवर्ती सहकारी बँकेवर प्रशासक; श्रीनिवास पांढरे यांची नियुक्ती

अमरावती : जिल्ह्यातील सहकाराचा कणा मानल्या जाणाऱ्या अमरावती जिल्हा मध्यवर्ती सहकारी बँकेवर शनिवारपासून (ता. १०) प्रशासकाचा कारभार सुरू झाला. विभागीय सहनिबंधक (लेखापरीक्षण) श्रीनिवास पांढरे यांची बँकेच्या प्रशासकपदी नियुक्ती करण्यात आली आहे. विभागीय सहनिबंधक (सहकारी संस्था) गौतम वर्धन यांनी ही नियुक्ती केली.

बँकेच्या विद्यमान संचालक मंडळाचा कार्यकाळ ४ ऑक्टोबरला संपला. त्यानंतर प्रशासक नेमला जातो की मंडळाला मुदतवाढ मिळते, याबाबत चर्चा सुरू होती. सत्ताधारी संचालकांनी मुदतवाढीसाठी उच्च न्यायालयात धाव घेतली होती; मात्र याचिका फेटाळली गेल्याने प्रशासक नेमला जाणार हे स्पष्ट झाले होते. या नियुक्तीमुळे आमदार बच्चू कडू आणि उपाध्यक्ष अभिजीत ढेपे यांच्या नेतृत्वाखालील मंडळाचा कार्यकाळ संपुष्टात आला.

बँकेच्या निवडणुकीची तारीख अद्याप ठरलेली नाही; तरीही इच्छुकांची चाचपणी आणि पॅनेलची जुळवाजुळव सुरू झाली आहे. बँकेत एकीकडे कडू-ढेपे गट आणि दुसरीकडे बबलू देशमुख, खासदार बळवंत वानखडे व माजी आमदार प्रा. वीरेंद्र जगताप यांचा गट यांच्यात दीर्घकाळ संघर्ष राहिला आहे. त्यामुळे येत्या काळात सहकार क्षेत्रातील राजकारण तापण्याची चिन्हे आहेत.

माहिती स्रोत: हिंदुस्थान समाचार