पाणीटंचाईमुळे अकोल्यातील बांधकामे ठप्प; मजुरांचा रोजगार बुडाला, अनेकांची गावाकडे वाटचाल

अकोला : जिल्ह्यातील तीव्र पाणीटंचाई आणि दुष्काळसदृश परिस्थिती लक्षात घेऊन जिल्हाधिकाऱ्यांनी पिण्याच्या पाण्याला प्राधान्य देत बांधकामांना तातडीने स्थगिती दिली आहे. नव्याने सुरू होणारी आणि ७० टक्क्यांपेक्षा कमी पूर्ण झालेली बांधकामे थांबवण्यात आली आहेत. या निर्णयामुळे स्थानिक बांधकाम व्यवसायावर मोठा परिणाम झाला आहे.

शहर आणि आसपास रोजंदारीने बांधकामावर राबणाऱ्या शेकडो मजुरांचे काम एका झटक्यात थांबले आहे. काम नसल्याने परजिल्ह्यांतून आणि ग्रामीण भागातून आलेल्या अनेक मजुरांनी मूळ गावी परतण्याचा निर्णय घेतला आहे. अंतिम टप्प्यातील काही बांधकामे सुरू असली तरी मजुरांच्या कमतरतेमुळे त्यांचा वेग मंदावला आहे.

सिमेंट आणि विटांबरोबरच टाइल्स, हार्डवेअर, प्लंबिंग साहित्य, रंग आणि सळई विक्रेत्यांनाही फटका बसला आहे. टाइल्सची मागणी मोठ्या प्रमाणात घटली असून गोदामांत माल पडून आहे. कर्मचाऱ्यांचे पगार, दुकानांचे भाडे आणि बँकेचे हप्ते कसे फेडायचे, ही चिंता विकासक, कंत्राटदार आणि व्यापाऱ्यांना सतावत आहे.

माहिती स्रोत: नवराष्ट्र