दुष्काळग्रस्तांना हेक्टरी एक लाखाची मदत द्या; काँग्रेस प्रदेशाध्यक्ष हर्षवर्धन सपकाळ यांची धुळ्यात मागणी

धुळे : काँग्रेसचे प्रदेशाध्यक्ष हर्षवर्धन सपकाळ यांनी शनिवारी धुळे तालुक्यातील मुकटी शिवारात शेताच्या बांधावर जाऊन दुष्काळामुळे वाळलेल्या कपाशी आणि मक्याच्या पिकांची पाहणी केली आणि शेतकऱ्यांशी संवाद साधला. दुष्काळाची स्थिती गंभीर असताना सरकार ठोस मदत देण्याऐवजी केवळ पोकळ घोषणा करत असल्याची टीका त्यांनी केली आणि सरकारच्या उपाययोजनांचे वर्णन ‘राजा उदार झाला अन् हाती भोपळा दिला’ असे केले.

दुष्काळग्रस्त शेतकऱ्यांना तातडीने हेक्टरी एक लाख रुपये, शेतमजुरांना २५ हजार रुपयांची विशेष मदत आणि सरसकट कर्जमाफी जाहीर करावी, अशी मागणी सपकाळ यांनी केली. ही मदत दसऱ्यापूर्वी थेट शेतकऱ्यांच्या बँक खात्यात जमा व्हावी, अन्यथा शेतकऱ्यांचा सरकारवरील विश्वास उरणार नाही, असे ते म्हणाले.

सरकारने केवळ पंचनामे आणि घोषणांमध्ये वेळ घालवू नये, तर प्रत्यक्ष बांधावर जाऊन परिस्थिती समजून घेत मदतीचे निर्णय घ्यावेत, असेही ते म्हणाले. वाढता उत्पादनखर्च, सततची नापिकी आणि बाजारभावातील अनिश्चिततेमुळे शेतकरी संकटात असल्याचे त्यांनी सांगितले.

या वेळी काँग्रेसचे जिल्हाध्यक्ष युवराज करनकाळ, धुळे तालुका अध्यक्ष रितेश पाटील यांच्यासह पदाधिकारी, कार्यकर्ते आणि शेतकरी उपस्थित होते.

माहिती स्रोत: लोकसत्ता; सकाळ