भोकरदन तालुक्यातील वाकडी गावात पंधरा दिवसांपासून नळाला पाणी नाही; जुई धरण कोरडे

आन्वा : भोकरदन तालुक्यात यंदा भीषण दुष्काळ असून सुमारे पाच हजार लोकसंख्येच्या वाकडी गावाचा पाणीपुरवठा विस्कळित झाला आहे. पाइपलाइन वारंवार फुटत असल्याने गावाला गेल्या पंधरा दिवसांपासून नळाद्वारे पाणी मिळालेले नाही. त्यामुळे ग्रामस्थांना खासगी विहिरींचा आधार घेऊन तहान भागवावी लागत आहे.

तब्बल तीस वर्षांनंतर गावाच्या पाणीपुरवठ्यासाठी २०१८ मध्ये मुख्यमंत्री ग्रामीण पेयजल योजनेतून १ कोटी २२ लाख रुपयांची योजना मंजूर झाली होती. मात्र ती अद्याप पूर्ण झालेली नाही. योजनेची पाइपलाइन महिन्यातून तीन ते चार वेळा फुटते आणि कामाचा दर्जा निकृष्ट असल्याने दोन वर्षांतच योजनेचा बट्ट्याबोळ झाला, असा ग्रामस्थांचा आरोप आहे.

पावसाने मोठा खंड दिल्याने तालुक्यातील जुई धरण कोरडे पडले आहे आणि सार्वजनिक विहिरींमध्येही पाणी नाही. ग्रामपंचायतीकडून आता नवीन पाइपलाइन टाकण्याचे काम सुरू आहे.

वाकडी ग्रामपंचायतीवर सध्या प्रशासक आहे. प्रशासक आणि अधिकारी ग्रामस्थांच्या पाणीप्रश्नाकडे दुर्लक्ष करत असल्याचा आरोप करत गावात तीव्र नाराजी व्यक्त होत आहे.

माहिती स्रोत: पुढारी