थकीत वेतन आणि अनुदानासाठी परभणी मनपा कर्मचाऱ्यांचा २१ ऑक्टोबरपासून पुन्हा काम बंदचा इशारा

परभणी : महापालिकेतील अधिकारी व कर्मचाऱ्यांच्या प्रलंबित मागण्यांकडे प्रशासनाने तातडीने लक्ष न दिल्यास २१ ऑक्टोबरपासून काम बंद करून संपावर जाण्याचा इशारा अधिकारी-कर्मचारी संघटनेने दिला आहे. २० ऑक्टोबरपूर्वी जीएसटीचे थकीत आणि वाढीव अनुदान उपलब्ध करून द्यावे आणि तीन महिन्यांचे थकीत वेतन द्यावे, अशा मागण्या संघटनेचे अध्यक्ष नासेर खान यांनी मांडल्या आहेत.

जीएसटीचे थकीत व वाढीव अनुदान शासनाने द्यावे, या मागणीसाठी कर्मचाऱ्यांनी ऑगस्टमध्ये संप पुकारला होता. महिनाभर चाललेला हा संप पदाधिकाऱ्यांच्या पुढाकाराने आणि प्रशासनाने दिलेल्या लेखी आश्वासनानंतर ११ सप्टेंबरला मागे घेण्यात आला होता.

या संदर्भात पालिकेच्या बी. रघुनाथ सभागृहात अधिकारी-कर्मचाऱ्यांची बैठक झाली. तीन महिन्यांचे वेतन थकल्याने घरखर्च, मुलांचे शिक्षण आणि आरोग्याचा खर्च भागवताना कर्मचाऱ्यांची ओढाताण होत असल्याचा मुद्दा बैठकीत मांडण्यात आला. प्रशासनाने कर्मचाऱ्यांच्या मागण्यांकडे गांभीर्याने पाहून अनुदानाचा प्रश्न सोडवावा आणि थकीत वेतन तातडीने द्यावे, अशी मागणी संघटनेने केली. संघटनेचे मराठवाडा अध्यक्ष के. के. आंधळे या वेळी उपस्थित होते.

माहिती स्रोत: सकाळ