रेल्वेगाड्यांच्या वेळेनुसार बससेवा सुरू करा; सोनपेठमधील प्रवाशांची मागणी

सोनपेठ : शहरातून परभणी, परळी आणि बीड रेल्वेस्थानकांवर जाणाऱ्या प्रवाशांची संख्या मोठी आहे. पुणे, मुंबई आणि हैदराबादसह विविध शहरांत जाण्यासाठी हे प्रवासी रेल्वेवर अवलंबून असतात. त्यांची गैरसोय टाळण्यासाठी रेल्वेच्या वेळापत्रकाशी जुळणारी बससेवा सुरू करावी, अशी मागणी प्रवाशांनी केली आहे.

सोनपेठहून नुकतीच बीड आणि परभणीसाठी बससेवा सुरू झाली असून तिचे श्रेय घेण्यासाठी राजकीय पदाधिकाऱ्यांमध्ये चढाओढ दिसली. मात्र या बसच्या वेळा प्रवाशांच्या गरजेनुसार ठरवणे अधिक महत्त्वाचे आहे, असे प्रवाशांचे म्हणणे आहे. परभणी स्थानकावरून मुंबईकडे जाणाऱ्या देवगिरी आणि नंदीग्राम एक्स्प्रेसच्या वेळेनुसार सोनपेठ–परभणी बस, तर परळी स्थानकावरून हैदराबादकडे ये-जा करणाऱ्या गाड्यांच्या वेळेनुसार सोनपेठ–परळी बसचे नियोजन करावे, अशी त्यांची मागणी आहे.

बीड येथे नव्याने सुरू झालेल्या रेल्वेस्थानकावरून पुण्याला जाणाऱ्या आणि पुण्याहून येणाऱ्या गाड्यांच्या वेळांशी जुळणारी सोनपेठ–बीड बसही सुरू करावी, तसेच नांदेड–पूर्णा मार्गे सकाळी जाणारी आणि रात्री परतणारी स्वतंत्र बससेवा सुरू करावी, अशी मागणीही प्रवाशांनी केली आहे. असे वेळापत्रक झाल्यास विद्यार्थी, नोकरदार, व्यापारी, रुग्ण आणि सर्वसामान्य प्रवाशांना फायदा होईल, असे त्यांचे म्हणणे आहे.

माहिती स्रोत: सकाळ