राहाता तालुक्यात चालत्या दुचाकीवर बिबट्याची झडप; मागे बसलेली महिला जखमी

कोल्हार : राहाता तालुक्यातील भगवतीपूर-पाथरे शिवेवर शुक्रवारी (ता. ९) सायंकाळी चालत्या दुचाकीवर मागे बसलेल्या महिलेवर बिबट्याने हल्ला केला. यात महिलेच्या पायाला गंभीर इजा झाली असून तिच्यावर जिल्हा रुग्णालयात उपचार सुरू आहेत. दुचाकी चालवणाऱ्या पतीने प्रसंगावधान राखल्याने दोघेही बचावले.

पाथरे बुद्रुक येथील हे दांपत्य कामानिमित्त पाथरेहून कोल्हारकडे निघाले होते. खर्डे, शिंदे आणि पाटोळे वस्तीजवळ रस्त्याच्या कडेला त्यांना बिबट्याचे दोन बछडे दिसले. त्याच क्षणी रस्त्याच्या पलीकडून मादी बिबट्याने डरकाळी फोडत त्यांच्यावर झेप घेतली.

परिसरातील ग्रामस्थ मदतीसाठी घटनास्थळी धावले. बॅटरीचा प्रकाश टाकून आणि फटाके फोडून त्यांनी बिबट्याला तेथून पळवून लावले.

घटनेनंतर कोपरगावचे वनपरिक्षेत्र अधिकारी एम. वाय. शेख, वनरक्षक प्रतीक गजेवार, वन्यजीव रक्षक विकास म्हस्के, पाथरेचे सरपंच उमेश घोलप आणि राहाता बाजार समितीचे उपसभापती अण्णासाहेब कडू यांनी जखमी महिलेच्या कुटुंबाची भेट घेतली. परिसरात पिंजरा लावण्याचे काम सुरू असल्याचे शेख यांनी सांगितले. या हल्ल्यामुळे परिसरात भीतीचे वातावरण असून रहिवाशांना रात्री जागून काढाव्या लागत आहेत.

माहिती स्रोत: सकाळ