मंगरूळ येथे उसाला पाणी द्यायला गेलेल्या माजी सरपंचाचा विजेच्या धक्क्याने मृत्यू

हिमायतनगर : तालुक्यातील मंगरूळ येथील प्रगतिशील शेतकरी, गावचे माजी सरपंच आणि विविध कार्यकारी सेवा सहकारी सोसायटीचे संचालक असलेल्या ६१ वर्षीय व्यक्तीचा शुक्रवारी (ता. ९) सायंकाळी शेतात विजेचा धक्का लागून मृत्यू झाला. उसाच्या पिकाला पाणी देण्यासाठी ते शेतात गेले होते.

ते सायंकाळी पाचच्या सुमारास नेहमीप्रमाणे शेतात गेले. बांधावर दुचाकी उभी करून कपडे बदलल्यानंतर ते उसाच्या फडाकडे निघाले. त्या वेळी फडात तुटून पडलेल्या वीजतारेला त्यांचा स्पर्श झाला आणि जोरदार धक्क्याने त्यांचा जागीच मृत्यू झाला. माहिती मिळताच पोलीस निरीक्षक लक्ष्मण केंद्रे आणि सहकाऱ्यांनी घटनास्थळी जाऊन पंचनामा केला.

सामाजिक कार्यातही सक्रिय असलेल्या या शेतकऱ्याच्या निधनाने मंगरूळसह परिसरात हळहळ व्यक्त होत आहे. शनिवारी (ता. १०) शोकाकुल वातावरणात त्यांच्यावर अंत्यसंस्कार करण्यात आले. माजी आमदार माधवराव पाटील जवळगावकर यांनी कुटुंबीयांची भेट घेऊन सांत्वन केले. त्यांच्या पश्चात पत्नी, तीन मुले आणि एक मुलगी असा परिवार आहे.

माहिती स्रोत: पुढारी