कोपरगाव शहराला ९ ऑक्टोबरपासून सहा दिवसांनी एकदा पाणी; पुढचे आवर्तन लांबल्याने नगरपरिषदेचा निर्णय

कोपरगाव : दुष्काळसदृश परिस्थितीमुळे पाटबंधारे विभागाकडून पुढील पाणी आवर्तन उशिरा मिळणार असल्याने कोपरगाव नगरपरिषदेने शहराच्या पाणीपुरवठ्याचे वेळापत्रक बदलले आहे. ९ ऑक्टोबरपासून शहराला सहा दिवसांतून एकदा पाणी दिले जाईल, अशी माहिती नगरपरिषदेचे अधिकारी अजित निकत यांनी दिली. आवर्तन लांबणार असल्याचे नाशिक पाटबंधारे विभागाच्या अधिकाऱ्यांनी कळवले आहे.

शहराला पाणी पुरवणाऱ्या येसगाव येथील नगरपरिषदेच्या पाच साठवण तलावांपैकी पहिल्या तलावात सध्या ५.५ फूट, दुसऱ्यात ४ फूट, तिसऱ्यात ६ फूट, चौथ्यात १० फूट आणि पाचव्यात १५ फूट पाणी आहे. पाचही तलावांतील पाण्याची एकूण उंची ४०.५ फूट नोंदवली गेल्याचे पाणीपुरवठा विभागाचे लिपिक स्वप्निल जाधव यांनी सांगितले.

हा साठा पुढच्या आवर्तनापर्यंत पुरवणे हे नगरपरिषदेसमोरचे आव्हान आहे. उन्हाचा तडाखा वाढल्याने बाष्पीभवनातूनही साठा आणखी घटण्याची शक्यता आहे.

नागरिकांनी नळ विनाकारण उघडे ठेवू नयेत, अंघोळीसाठी कमी पाणी वापरावे, वाहने धुण्यासाठी पाणी वाया घालवू नये आणि बागेला मोजकेच पाणी द्यावे, असे आवाहन नगरपरिषदेने केले आहे. परिसरातील विंधनविहिरींचे पाणी गरजेनुसार वापरून सहकार्य करावे, असेही सांगण्यात आले आहे. सणासुदीच्या तोंडावरच पाणीपुरवठा आणखी लांबल्याने नागरिकांमध्ये नाराजी आहे.

माहिती स्रोत: पुढारी