पाय धुण्यासाठी गोसेखुर्दच्या उजव्या कालव्यात उतरलेले दाम्पत्य वाहून गेले; कोरंबी येथील घटना

भंडारा : नागपूरहून गावी आलेले एक नवदाम्पत्य रविवारी (११ ऑक्टोबर) शेत पाहण्यासाठी गेले असता पायांना चिखल लागल्याने पवनी तालुक्यातील कोरंबी येथे गोसेखुर्दच्या उजव्या कालव्यात पाय धुण्यासाठी उतरले. त्या वेळी पत्नीचा पाय घसरून ती कालव्यात पडली आणि तिला वाचवण्यासाठी पतीनेही पाण्यात उडी घेतली, असे ‘पुढारी’ने म्हटले आहे.

कालव्यात चार मीटरहून अधिक पाणी असून प्रवाह जोरदार असल्याने दोघेही वाहून गेले. दोघांचाही बुडून मृत्यू झाल्याची भीती असून त्यांचा शोध सुरू आहे. पाण्याचा मोठा प्रवाह आणि अंधारामुळे शोधकार्यात अडथळे येत असले तरी पोलीस प्रशासन युद्धपातळीवर शोध घेत आहे.

कामानिमित्त नागपूरला राहणारे हे दाम्पत्य दोन दिवसांपूर्वीच वडिलोपार्जित शेत पाहण्यासाठी गावी आले होते. यंदा उन्हाळ्यातच त्यांचे लग्न झाले होते. या घटनेने परिसरात हळहळ व्यक्त होत आहे.

माहिती स्रोत: पुढारी