मिठमुंबरीत कायाकिंग प्रकल्पावरून वाद; विश्वासात न घेतल्याचा मच्छिमारांचा आरोप

देवगड : रविवारी सकाळी मिठमुंबरीच्या बागवाडी जेटीवर कायाकिंग प्रकल्पाच्या शुभारंभावरून स्थानिक मच्छिमार, ग्रामस्थ आणि प्रकल्पकर्त्यांमध्ये वाद झाला. स्थानिक मच्छिमारांना विश्वासात न घेता प्रकल्प सुरू केला जात असून त्यामुळे मासेमारीला बाधा येईल, अशी भीती व्यक्त करत ग्रामस्थांनी विरोध केला. त्यामुळे काही काळ तणावाचे वातावरण होते.

नरेश डामरी आणि त्यांचे सहकारी हा प्रकल्प सुरू करत होते. ग्रामपंचायतीने प्रकल्पाला परवानगी दिली असून पर्यटनवाढ, स्थानिकांना रोजगार आणि गावाच्या उत्पन्नासाठी तो महत्त्वाचा आहे, असे सरपंच बाळकृष्ण गावकर यांनी सांगितले. आवश्यक कायदेशीर प्रक्रिया पूर्ण केल्याचे आणि पर्यटन व मासेमारी एकत्र चालू शकतात, असे प्रकल्पकर्त्यांच्या वतीने अनिल कोरगावकर यांनी सांगितले.

जेटीवरच आपला उदरनिर्वाह अवलंबून असल्याचे सांगत, पर्यटनाला विरोध नाही; मात्र स्थानिकांना विश्वासात घेऊनच प्रकल्प राबवावा, अशी भूमिका मच्छिमारांनी मांडली.

तणाव वाढत असल्याचे लक्षात येताच देवगड पोलीस घटनास्थळी दाखल झाले. सहायक पोलीस निरीक्षक संतोष उगलमुगले यांनी सामोपचाराने तोडगा काढण्याचे आवाहन केले, तर पंचायत समिती सभापती गणेश राणे यांनीही मध्यस्थी केली. पालकमंत्री नितेश राणे यांनी प्रकरणाची दखल घेतली असून प्रकल्पकर्ते, ग्रामस्थ आणि मच्छिमारांची संयुक्त बैठक घेतली जाणार असल्याचे ॲड. सिद्धेश माणगावकर यांनी सांगितले. ग्रामपंचायतीच्या विशेष ग्रामसभेत निर्णय घेण्यावर सर्वांचे एकमत झाल्याने वादावर तूर्त पडदा पडला.

माहिती स्रोत: पुढारी