बीड शहराला पाणी देणाऱ्या बिंदुसरा तलावात केवळ ५ टक्के साठा; चारा फक्त पंधरा दिवसांचा

बीड : पावसाच्या प्रदीर्घ ओढीमुळे जिल्ह्यात पिण्याचे पाणी आणि जनावरांचा चारा यांचा प्रश्न गंभीर झाला आहे. बीड शहराला पाणी पुरवणाऱ्या बिंदुसरा तलावातील उपयुक्त साठा आता अवघा ५ टक्के राहिला आहे, तर मागील वर्षी या दिवसांत तो शंभर टक्के भरलेला होता. शहराला रोज लागणाऱ्या ३८ एमएलडी पाण्यासाठी आता माजलगाव धरणावर अवलंबून राहावे लागणार असून उपलब्ध साठा केवळ पिण्यासाठी राखून ठेवण्याचा निर्णय प्रशासनाने घेतला आहे, अशी माहिती केंद्रीय पथकाच्या दोन दिवसांच्या दौऱ्यात समोर आली.

मोरगाव, वैद्यकिन्ही, दासखेड या गावांतील पाझर तलावही आटले असून विहिरींनी तळ गाठला आहे. दासखेड येथे एका शेतकऱ्याने तीन एकर सोयाबीनसाठी ५४ हजार रुपये खर्च केले, पण दीड-दोन क्विंटल म्हणजे जेमतेम नऊ-दहा हजार रुपयांचे उत्पादन मिळण्याची शक्यता आहे. डाळिंब आणि मोसंबीच्या बागाही पाण्याअभावी सुकू लागल्या आहेत.

पाटोदा तालुक्यातील बेडूकवाडी येथे रोज सुमारे १३० लिटर दूध संकलन करणाऱ्या एका कुटुंबाकडे घरचा चारा केवळ पंधरा दिवस पुरेल एवढाच उरला आहे. बाहेरून चारा घ्यायचा तर टनाला ११ हजार रुपये मोजावे लागतात. सोयाबीनची वाढ खुंटल्याने यंत्राने काढणी करावी लागली, त्यामुळे जनावरांसाठी भुसकटही मिळालेले नाही.

फळबागा वाचवण्यासाठी हेक्टरी दोन लाख रुपयांची तातडीची मदत, शेततळ्यांसाठी ५० हजार रुपयांचे अनुदान आणि जनावरांसाठी तात्काळ चारा डेपो सुरू करावेत, अशा मागण्या शेतकऱ्यांनी जिल्हाधिकारी विवेक जॉन्सन, राज्याचे कृषी सचिव परिमल सिंग आणि केंद्रीय पथकप्रमुख मुक्तानंद अग्रवाल यांच्यासमोर मांडल्या.

माहिती स्रोत: महासंवाद