अकोल्यात रजपूतपुरा भागात दोन मजली इमारतीचा भाग कोसळला; ढिगाऱ्याखालून चार मुलींना सुखरूप काढले

अकोला : शहरातील रजपूतपुरा भागात महापालिकेच्या मोटार वाहन विभागाच्या मागे असलेल्या एका दोन मजली इमारतीचा मोठा भाग रविवारी (ता. ११) सकाळी अचानक पत्त्याच्या बंगल्यासारखा कोसळला. इमारतीत राहणाऱ्या कुटुंबातील चार मुली ढिगाऱ्याखाली दबल्या होत्या; स्थानिक नागरिकांनी धाव घेऊन त्यांना सुखरूप बाहेर काढले.

एका मुलीच्या पायाला फ्रॅक्चर झाल्याने तिला सर्वोपचार रुग्णालयात दाखल करण्यात आले, तर इतर मुलींना किरकोळ दुखापत झाली. घटनेनंतर महापालिकेच्या पथकाने घटनास्थळी पोहोचून जेसीबीच्या साहाय्याने ढिगारा हटवण्याचे काम सुरू केले.

स्थानिकांच्या माहितीनुसार इमारतीचे बांधकाम फार जुने नव्हते; तरीही ती कोसळण्यामागचे नेमके कारण काय, असा प्रश्न उपस्थित होत आहे. खासदार अनुप धोत्रे आणि स्थायी समिती सभापती विजय अग्रवाल यांनी घटनास्थळी जाऊन पाहणी केली आणि नागरिकांकडून माहिती घेतली.

माहिती स्रोत: लोकसत्ता; तरुण भारत