सोलापुरात ११ ते १८ ऑक्टोबरदरम्यान २५ हजार डॉलरची आंतरराष्ट्रीय पुरुष टेनिस स्पर्धा

सोलापूर : सोलापूर जिल्हा लॉन टेनिस संघटनेतर्फे अखिल भारतीय टेनिस संघटना आणि महाराष्ट्र राज्य लॉन टेनिस संघटनेच्या (एमएसएलटीए) मान्यतेने २५ हजार डॉलर बक्षीस रकमेची आयटीएफ पुरुष टेनिस स्पर्धा आयोजित करण्यात आली आहे. राज्य शासन, सोलापूर महापालिका आणि जिल्हाधिकारी कार्यालयाच्या सहकार्याने ही स्पर्धा ११ ते १८ ऑक्टोबरदरम्यान जिल्हा क्रीडा संकुलातील एमएसएलटीए टेनिस कोर्टवर होईल.

पात्रता फेरीचे सामने ११ आणि १२ ऑक्टोबरला, तर मुख्य ड्रॉचे सामने १३ ते १८ ऑक्टोबरदरम्यान होतील. जिल्हाधिकारी डॉ. एस. कार्तिकेयन यांच्या हस्ते १२ ऑक्टोबरला सायंकाळी पाच वाजता स्पर्धेचे उद्घाटन होईल. भारतासह अमेरिका, जपान, ट्युनिशिया, थायलंड, स्वित्झर्लंड, स्वीडन, कझाकस्तान आणि नेपाळ या नऊ देशांतील खेळाडू सहभागी होणार आहेत.

अमेरिकेच्या गॅरेट जॉन्सला अव्वल मानांकन असून भारताचा करण सिंग दुसऱ्या, ट्युनिशियाचा अझीझ ओउका तिसऱ्या आणि भारताचा दिग्विजय प्रताप सिंग चौथ्या मानांकनावर आहे. अर्णव पापरकर आणि अनुप बंगार्गी यांना मुख्य ड्रॉसाठी वाइल्ड कार्ड मिळाले आहे.

विजेत्याला करंडक आणि ५० एटीपी गुण, तर उपविजेत्याला ३० गुण मिळतील. भारतीय खेळाडूंना आंतरराष्ट्रीय क्रमवारीत पुढे जाण्यासाठी एटीपी गुण आणि बक्षीस रक्कम मिळवण्याची संधी या स्पर्धेमुळे मिळेल, असे एमएसएलटीएचे मानद सचिव सुंदर अय्यर यांनी सांगितले. इराणच्या नेदा काझेमी आयटीएफ पर्यवेक्षक असून राजीव देसाई स्पर्धा संचालक आहेत.

माहिती स्रोत: नवराष्ट्र